Ministrja e Punëve të Jashtme e Kosovës, Donika Gërvalla, ka treguar se si Serbia ka kërcënuar me luftë përgjatë 2 viteve të fundit.
E pyetur për rrezikun e luftës, Gërvalla tha se Serbia dhe Rusia po bëjnë “veprime të fshehta” edhe në vende tjera të rajonit.
“Vetëm në 2 vitet e fundit, presidenti serb Vuçiq e kërcënoi Kosovën disa herë me luftë, madje duke vendosur trupa në kufirin tonë, duke dërguar avionë luftarakë, duke pritur ambasadorin rus për vizita atje, duke përfshirë ushtrinë ruse në ministrinë e mbrojtjes serbe, duke rritur kapacitetet ushtarake dhe stërvitjet me Rusinë nga rreth 10 deri në afro 100 në vit gjatë vitit 2021. Së fundmi, ne zbuluam mercenarët e Wagner në kufirin tonë dhe kontrabandën e armëve në Kosovë. Veprime të tjera të fshehta nga Rusia dhe Serbia po ndodhin në vende të tjera të rajonit”, tha Gërvalla.
Ndryshe nga shumë të tjerë, Gërvalla tha se “ne e njohim shumë mirë Vuçiqin dhe ministrin e tij të jashtëm Daçiq”.
“Të 2 njerëzit ishin ndihmësit më të afërt të ‘Kasapit të Ballkanit’, ish-presidentit serb dhe kriminelit të luftës Millosheviq. Vuçiq ishte ministri i tij i propagandës dhe Daçiq ishte dora e djathtë e tij gjatë luftës, masakrave dhe mizorive më të rënda ndaj vendit dhe popullit tonë, jo vetëm që nuk kërkuan falje, por edhe publikisht i nderojnë kriminelët e luftës dhe i mohojnë e falsifikojnë ngjarjet”, tha kryediplomatja kosovare, në një intervistë për gazetën hebraike, Israel Hayo.
“Arsyeja që kjo qasje agresive nuk po shndërrohet në konflikt të hapur është vetëpërmbajtja e qeverisë sonë dhe prania e trupave amerikane në Kosovë. Vetëm së fundi, Shtetet e Bashkuara i dhanë një paralajmërim të ashpër Vuçiqit, i cili donte të vendoste trupa serbe në vendin tonë”, tha Gërvalla, transmeton Sinjali .
Ajo tha se “Kosova, ashtu si Izraeli, është mësuar me kërcënime të vazhdueshme”, duke theksuar se “ne jemi pjesë e Perëndimit, ndërsa Serbia është përfaqësuese e Putinit”.
