Kosova këtë të premte po feston 15 vjetorin e Pavarësisë, kjo ditë u përcoll më zhvillime të shumta të gjitha njëra pas tjetrës, raporton InLajmi.
Ishte Nisma Socialdemokrate ajo e cila ftoi qytetarët t’i bashkohen tubimit “Festojmë më Ju”, tubim ky i thirrur nga partia në fjalë.
Ky manifestim ndryshe u konsiderua edhe si protestë në mbrojtje të ish-krerëve të shtetit, të cilët po gjykohen në Hagë.
I pari i Nismës, Fatmir Limaj tha se të gjithë sot po shprehin mirënjohje për ata që shpallën Pavarësinë e Kosovës.
“Sot të gjithë jemi mbledhur këtu për të nderuar dhe për të shprehur mirënjohje për shpallësit e Pavarësisë së Kosovës. Ne sot këtu bashkë, e kudo ku ka shqiptarë, festojmë me ata që e shpallën Kosovën shtet të pavarur dhe të lirë”, tha Limaj.
Limaj u shpreh se kjo ditë i dedikohet veçanërisht Thaçit, Krasniqit, Veselit e të cilët do të nderohen çdo herë jo vetëm në 17 shkurt.
“Festojmë me ju President i Republikës, Hashim Thaçi; Kryetar i Kuvendit Jakup Krasniqi; Kryetar i Kuvendit, Kadri Veseli. Sot në krye me Komandantin legjendar i nderojmë të gjithë dëshmorët e kombit. Çdo 17 shkurt është moment i nderimit”, tha ai./InLajmi/
