Kandidati për kryetar të Serbisë, Nikolla Sandulloviq, i cili ndodhet në një vizitë zyrtare në Kosovë, ka shprehur hapur qëndrimin e tij ndaj Kosovës, sipas të cilit Kosova është pavarësuar që në vitin 1999.
“Për mua si kryetar i Partisë Republikane, Kosova është çështje përfunduar që nga viti 1999, në një mënyrë tragjike për qytetarët e Kosovës dhe që Serbia ia ka borxh një kërkim-falje shumë të madhe”, deklaroi Sandulloviq.
Ai, në RTKPrime, ndër të tjera ka deklaruar se është një politikan që mbështet pavarësinë e Kosovës dhe që ka ardhur për të ofruar zgjidhjen historike, si shembull për zgjidhje të tjera në Evropë.
“Të qenit tim këtu dëshmon se ju keni përparuar dhe keni merituar një vend në shoqërinë demokratike”, tha Sandulloviq.
Ndërkaq, i pyetur se si pranohet ideja e tij për zgjidhjen e çështjes së Kosovës dhe Serbisë, Sandulloviq theksoi se atje nuk ka hapësirë të deklarohet lirshëm e hapur në mediat serbe.
Sandulloviq: Rezoluta 1244 nuk ekziston, këtë nuk guxon ta thotë askush
Kryetari i Partisë Republikane, Nikolla Sandulloviq, në RTKPrime, lidhur me rezolutën 1244, ku përmendet Kosova si pjesë e Jugosllavisë, theksoi se, në fakt, ai shtet ishte zhdukur, nuk ekzistonte më dhe këtë fakt, sipas tij, nuk guxon ta thotë askush.
Tutje ai përmendi edhe provokimet e rënda nga kundërshtari i tij politik, Aleksandar Vuçiq, i cili kishte bërë disa atentate ndaj Sandulloviqit deri edhe helmimin me sarin.
Sipas tij rrethanat tani në Serbi janë më të rënda, sesa në kohën e Millosheviqit.
