Kryeministri i vendit Albin Kurti, në seancën e Kuvendit të Kosovës përkundër kritikave që pati nga opozita për keqqeverisje, ai vazhdoi “avazin e vjetër”, duke lavdëruar punën e Qeverisë si shpeshherë, raporton InLajmi.
Kurti tha se Qeveria e Kosovës po punon në avansimin e sektorit të teknologjisë së informacionit në Kosovë.
Gjithashtu ai iu përgjigj edhe kritikave të opozitës për migrimin, duke u thënë se “migrimi nuk mund të rregullohet shpejt”, por që premtoi se do të hapen vende të reja të punës për parandalimin e migrimit.
Tutje, ai foli edhe për tërheqjen e njohjeve nga disa shtete, duke thënë se kjo është vetëm pjesë e fushatës së Serbisë.
“Republika e Togos ka deklaruar njohjen më 2 korrik 2014 dhe vendosja e marrëdhënieve diplomatike është bërë po atë vit, më 22 korrik. Nuk kemi pranuar një dokument ose vendim për shkëputje të marrëdhënieve diplomatike. Fushatat e Serbisë në këtë drejtim nuk janë ndalur asnjëherë. Qeveria nuk ka pranuar asnjë vendim për të ashtuquajturat tërheqje të njohjeve në asnjë prej rasteve të përmendura nga Daçiqi e Vuçiqi”. /InLajmi/
