Fuqia punëtore, të rinjtë çdo ditë e më shumë po largohen nga Kosova, kjo për shkak të mungesës së vendeve të punës, e përgjithësisht perspektivës së munguar në shtetit tonë, shkruan InLajmi.
Vetëm gjatë 2 viteve të fundit, sipas të dhënave nga Sindikata e Pavarur e Sektorit Privat, 92.300 punëtorë e kanë lëshuar vendin, shifër kjo mjaft shqetësuese për vendin tonë, i cili në të ardhmen e afërt mund të përballet me mungesë të punëtorëve. Përkundër shumë sfidave për të siguruar një vend të punës, sektori privat mbetet alternativë bazë e punësimit për shumë të rinj, të cilët jo rrallëherë ballafaqohen edhe me vështirësi të shumëta dhe me pagë jodinjitoze.
Kujdesi shtetëror për të punësuarit në sektorin privat është “i padukshëm”, ndërkohë që kjo pakujdesi cilësohet si diskriminim i të punësuarve në këtë sektor, që për momentin është gjeneruesi potencial i vendeve të punës.
Kryetari i Sindikatës së Pavarur të Sektorit Privat, Jusuf Azemi, në një deklaratë për InLajmin tha se punëtorët e sektorit privat po diskriminohen në çdo aspekt dhe se atyre nuk po u bëhet trajtimi adekuat, çka edhe ka bërë që ata të zgjedhin rrugën e migrimit.
“Fakti që një numër i madh i të rinjëve kanë marrë rrugën e largimit nga Kosova është një shenjë që punëtorët e sektorit privat po diskriminohen në çdo aspekt, atë të sigurisë, të pagave dhe në aspektin e implementimit të ligjeve që kanë të bëjnë me punëtorët e sektorit privat. Këto shkelje ligjore që po bëhen ndaj punëtorëve nuk u kanë lënë atyre vullnet, që të vazhdojnë të qëndrojnë këtu. Prandaj, më shumë se 80% e punëtorëve të sektorit privat orientimin e kanë që të ikin jashtë vendit. Për më shumë se 2 dekada, punëtorët e sektorit privat nuk po u bëhet trajtimi adekuat, prandaj ata e kanë humbur durimin dhe po e ndjekin rrugën e migrimit”, tha Azemi.
Sipas Azemit, hendeku i dallimit mes sektorit privat dhe publik është i madh, pasi siç theksoi ai, këta punëtorë po përballen me orare të stërzgjatura dhe me paga të vogla në krahasim me atë publik.
“Punëtorët e sektorit privat janë diskriminuar edhe herën e fundit kur Qeveria e Kosovës nuk i përfshiu në Pakon e Ringjalljes Ekonomike, ajo i ka stimuluar vetëm punëtorët e sektorit publik dhe jo atë privat, kur dihet se pagat tona janë trefish më të vogla dhe gjendja në këtë sektor është më e rëndë si për orarin ashtu edhe kushtet e punës. Puna e sektorit privat me atë publik është gjithmonë më e madhe, si të themi 1 me 10, pasi ne jemi ata të cilët prodhojnë gjithherë”, tha ai për InLajmin.
Azemi shprehu shqetësimin se ka mungesë të madhe të punëtorëve të kualifikuar në shumë biznese private.
“Kjo ikje e punëtorëve është shqetësuese, pasi ka mungesë tepër të madhe punëtorëve të kualifikuar, ku për pasojë shumë kompani nuk mund të aplikojnë për projekte në Qeverinë e Kosovës pikërisht për këtë arsye”, tha ai.
I pyetur se çfarë duhet të ndërmarrë tash e tutje Qeveria e Kosovës që të parandalojë ikjen e punëtorëve, Azemi tha se kjo “luftë për parandalim” është e përfunduar, pasi këta punëtorë edhe sikur të kenë pagën 1.000 euro, ata nuk do të kthehen e të dëgjojnë “premtimet e kota” nga Qeveria e Kosovës.
“Lufta për parandalimin e ikjes së punëtorëve nga Kosova është e përfunduar, pasi nuk ka shumë apo rritje të pagave që mund të parandalojë këta punëtorë. Edhe nëse këtyre punëtorëve u garantojmë se do të marrin pagë 1.000 euro kjo do të jetë e kotë, pasi kanë dëgjuar dokrra më shumë se 22 vite pas lufte”, tha Azemi.
Në fund, Azemi theksoi se Sindikata e Pavaruar e Punëtorëve të Sektorit Privat ka hartuar një planprogram para 2 viteve për parandalimin e ikjes së punëtorëve, mirëpo i njëjti nuk ishte përfillur nga Qeveria e Kosovës. Shqipe Vishaj /InLajmi/
