Kryeministri i vendit Albin Kurti, ka thënë se Shtetet e Bashkuara të Amerikës do të vazhdojnë të jenë partnerët, miqtë dhe aleatët kryesor në shtetndërtimin e Kosovës, raporton InLajmi.
Kurti komentoi edhe letrën e sekretarit Amerikan të Shtetit, Antony Blinken, i cili kishte thënë se dhëheqësit e Kosovës dhe të Serbisë do të duhet të bëjnë “kompromise të vështira” për të normalizuar marrëdhëniet e tyre.
“Unë nuk e kam lexuar atë letër ende dhe natyrisht që nuk e kam shkruar unë, prandaj besoj që Shtetet e Bashkuara të Amerikës vazhdojnë të jenë partnerët, miqtë dhe aleatët tanë kryesor në shtetndërtimin tonë demokratik, në zhvillimin ekonomik dhe në normalizimin e marrëdhënieve me Serbinë, që duhet ta ketë në qendër njohjen reciproke. Natyrisht që do të ketë edhe çështje të tjera në atë marrëveshje përveç njohjes reciproke por ajo është në qendër”, tha Kurti.
Kurti tha se Qeveria vazhdon të angazhohet për hallet e serbëve lokalë.
“Dialogu me serbët lokalë është i përditshëm, përgjithësisht jopublik edhe vizitat në terren, edhe pritjet e tyre në ministri dhe kryeministri tona janë të rregullta, ne takohemi me ta për hallet e tyre që janë të aspektit social e ekonomik, por edhe të drejtësisë dhe të qasjes sa më të kollajshme në institucionet e vendit tonë”, tha Kurti. /InLajmi/
