Kreu i Partisë Demokratike të Kosovës, Memli Krasniqi, në 53 vjetorin e themelimit të Universitetit të Prishtinës kujton rezistencën e profesorëve dhe studentëve të këtij institucioni të lartë të arsimit në rrugëtimin e vendit për liri, përcjell InLajmi.
Krasniqi në këtë përvjetor tha se ishte Universiteti i Prishtinës i cili përveç si institucion i lartë arsimor u kthye edhe në kështjellë të dijes e rezistencës.
Tutje thekson Krasniqi se historikisht studentët e profesorët e UP-së së bashku artikuluan aspirata kombëtare dhe drejt rrugës së lirisë.
Tutje Krasniqi tha se rinia ka qenë forca shtytëse në rrugën e lirisë dhe pavarësisë gjithmonë dhe po e njëjta frymë duhet të jetë akoma.
Postimi i plotë i tij:
Sot festojmë 53-vjetorin e Universitetit të Prishtinës “Hasan Prishtina”, institucionit që formësoi identitetin kombëtar, shtroi rrugën akademike dhe zgjoi shpirtin liridashës të qytetarëve të Kosovës.
UP-ja, që nga themelimi, u kthye në kështjellë të dijes e rezistencës, nga ku, historikisht, studentë e profesorë së bashku, artikuluan aspiratat tona kombëtare dhe projektuan rrugën e lirisë.
Kur jemi vetëm 2 ditë larg nga festimi i 15 vjetorit të Pavarësisë së Kosovës, shprehim mirënjohjen e madhe për të gjitha gjeneratat e profesorëve, asistentëve, studentëve dhe stafit tjetër përbërës të UP-së, për kontributin e çmueshëm drejt përmbushjes së këtij ideali.
Fatkeqësisht, sot, shumë studentë të jashtëzakonshëm nuk po e shohin të ardhmen në Kosovë. Shkaqet tashmë janë të mirënjohura: mundësitë e kufizuara të punësimit, humbja e shpresës dhe mungesa e vizionit qeverisës.
Prandaj, nëse ekziston sot një prioritet për të cilin duhet të përkushtohemi të gjithë – padyshim është rikthimi i besimit tek të rinjtë për të ndërtuar një të ardhme të sigurtë dhe të mirëfilltë në vendin tonë.
Në këtë drejtim, është obligim dhe përgjegjësi e secilit prej nesh që të veprojmë dhe të angazhohemi.
Ndërtimi i një shteti i cili krijon më shumë mundësi për përmbushjen e potencialit rinor – është i vetmi çelës për të mbajtur rininë tonë të mrekullueshme në vend – e për të cilën kemi aq shumë nevojë.
Rinia ka qenë forca shtytëse në rrugën e lirisë dhe pavarësisë. Rinia duhet të jetë edhe energjia e cila ndërton dhe zhvillon vendin tonë.
Së bashku mund t’ia dalim – besoni në Kosovë!/InLajmi/
