Ish-kryeministri Avdullah Hoti, ka kritikuar Qeverinë e Kosovës për keqqeverisje përgjatë këtyre 2 viteve, përcjell InLajmi.
Hoti thotë se Qeveria e Kosovës pas këtyre 2 viteve do të duhej të identifikonte projektet investive, vendet e reja të punës, të bënte reforma në arsim e shëndetësi, si dhe të numëronte njohje të reja dhe anëtarësimin në organizatat ndërkombëtare.
Ai thekson se në vend të zhvillimit, kjo qeveri në 2 vite qeverisje karakterizohet nga numri i madh i rinisë që kanë emigruar, problemet në veri, kaosi energjetik, mungesa e barnave dhe emigrimi i mjekëve, ulja e pagave dhe futjen e dialogut në një udhë pa krye.
Postimi i plotë i tij:
Sot, pas dy vitesh qeverisje, do të duhej:
– lehtësisht të identifikoheshin projektet investive (së paku të nisura) dhe vendet e krijuara të punës,
– të numëroheshin çerdhet e ndërtuara,
– të numëroheshin banesat e ndërtuara për familjet e reja,
– të vëreheshin reformat në arsim e shëndetësi,
– të niste punën Fondi Sovran me pasuritë e AKP-së,
– të jepeshin kredi me norma të ulëta nga Banka Zhvillimore,
– të numëroheshin njohjet e reja të shtetit të Kosovës dhe anëtarësimet në organizma ndërkombëtarë.
JO, asnjëra nga këto nuk shihet as në horizont. Dy vite të qeverisjes, karakterizohen me:
– numrin e madh të rinisë që kanë emigruar,
– probleme në veri,
– kaos në energjetikë,
– mungesë e barnave dhe emigrim i mjekëve,
– valë të njëpasnjëshme të privatizimit të aseteve të AKP-së,
– ulje e pagave reale,
– mungesë e investimeve kapitale,
– rritje e deficitit tregtar me 1 miliard euro,
– kthim i Serbisë në partner kryesor tregtar në rajon me 371 milionë euro import,
– futja e dialogut në udhë pa krye,
– acarimi i marrëdhënieve me miqtë,
– protesta të sindikatave dhe ditë të humbura të mësimit. /InLajmi/
