Studimet akademike janë periudha më e mirë e jetës rinore ndërsa, studimet janë moment i rëndësishëm për të ardhmen e të rinjve derisa këtu ata gjejnë veten dhe i japin kahje jetës së tyre. Jeta studentore është e dëshiruar për një të ardhme më të ndritur, por studentët përveç mësimeve që duhet ti ndjekin ata kanë edhe sfida të ndryshme sikur që është çështja e banimit, ushqimit e ku mbeten edhe sigurimi i literaturës e shumë nevoja të tjera, shkruan InLajmi.
Prandaj kur bëhet fjalë për strehimin deri në përfundim të studimeve, gjithsecili/secila student kërkon një vend të pastër, të ngrohtë, me çmim të arsyeshëm e mbi të gjitha të jetë i sigurt, e jo rastësishtë e përmendëm në fund, pasi që siguria është pjesa kryesore për studime të qeta.
Për disa nga studentët vendi më i sigurt është Qendra e Studentëve, që tashmë është shndërruar në shtëpi për të gjithë studentët nga Kosova e vendet e rajonit.
Për të ofruar shërbime cilësore për studentët në Qendrën e Studentëve është investuar kohë të gjatë dhe në këtë kuadër investimet nuk kanë munguar edhe në konvikte, duke siguruar rehati, komoditet e siguri për studentët banues.
Por, jo të gjithë studentët banues në konvikte mund të shijojnë komoditetin dhe rehatinë, sepse disa nga ata duan që shpenzimet e studimeve ti mbulojnë duke punuar njëkohësisht edhe duke studiuar. Prandaj shumë student tashmë kanë krijuar marrëdhënie pune e kryesisht për orët e pasdites, por ata nganjëherë edhe hasin në vështirësi për shkak të kohës së kufizuar të kthimit në konvikte.
Pra siç e cekëm edhe më lartë shumë studentëve iu nevojitet puna për të mbuluar shpenzimet e banimit dhe shkollimit të tyre, por Gazeta InLajmi ka mësuar së disa studentëve edhe pse janë pajisur me vërtetim nga punëdhënësi dhe leje nga drejtori i konviktit përkatës, ata përsëri kanë hasur në vështirësi nga rojat e objektit.
Në lidhje me këtë “fenomen” Gazeta InLajmi ka kontaktuar drejtorin e Qendrës së Studentëve, Fatmir Sfishta i cili tha se konvikti posedon një rregullore e cila thotë shumë dhe sipas tij zbatohet në përpikëri.
Sfishta tha se për t’u kthyer brenda konviktit ekziston një orar e ai është fiks në ora 24:00, por ai tha se bëhen përjashtime për banuesit që punojnë dhe orari i tyre zgjatet edhe përtej orës së lartcekur.
Për më tepër, drejtori Sfishta theksoi se studentët lejohen të hyjnë në konvikte pas orës 24:00 nëse kanë vërtetim nga punëdhënësi dhe leje nga drejtori i konviktit.
“Qendra e Studentëve ka në fuqi rregulloret e brendshme mbi bazën e të cilave rregullohet funksionimi, siguria, qëndrimi ndër to edhe orari i kthimit në Qendër gjegjësisht në konvikte. Orari për kthimin në konvikte në bazë të rregullores mbi rendin shtëpiak është ora 24:00. Mirëpo studentët që punojnë dhe dëshmojnë me kontratë pune atëherë udhëheqësi i konviktit e pajisë me leje studentin për vonesë dhe studenti në momentin që tregon lejen lejohet të hyjë në konviktin që banon”, deklaroi Sfishta për Gazetën InLajmi.
Tutje drejtori Sfishta ka thënë se lëshimi i lejeve për hyrjen e studentëve të punësuar në konvikte pas orës 24:00 është bërë më të vetmen arsyeje që banuesit të arrijnë të mbulojnë shpenzimet e tyre.
“Natyrisht se po për të ndihmuar këtë kategori të studentëve, pra ata që iu nevojitet puna për të mbuluar shpenzimet e studimeve edhe kemi lëshuar lejet që ata të mos pengohen edhe në rast se kthehen pas orës 24:00”, theksoi Fatmir Sfishta, drejtori i Qendrës së Studentëve për Gazetën InLajmi.
Mirëpo, disa student që punojnë e janë banues të konvikteve, emra të njohur për redaksinë e InLajmit, kanë deklaruar se shpeshherë janë penguar, “maltretuar” nga rojet e konvikteve për disa minuta se gjoja ka kaluar koha e përcaktuar, pavarësisht se studentët u kanë treguar dëshmitë se mund të kthehen pas orarit me rregulloren e qendrës. Studentët kanë treguar për sfidat e tyre, ndërsa për InLajmin kanë bërë të ditur se pavarësisht “maltretimeve” për disa minuta ata janë lejuar të hyjnë, kurse roja me shumë përtesë ka hapur dyert duke “mërmëritur” disa fjalë sikur “sonte po ju lejojmë, por nesër jo”.
Për sjellje të tilla të rojeve të konvikteve, nuk ka njohuri drejtori i Qendrës së Studentëve i cili për InaLjmi, konfirmoi se askush nga studentët që punojnë nuk është ankuar se që është penguar apo që është refuzuar për të hy në objekt pas orës 24:00.
“Nuk kemi informata se ndonjë student është ndaluar, refuzuar kthimi kur ai student posedon lejen e lëshuar nga udhëheqësi. Nëse studenti kthehet nga sigurimi pasi nga udhëheqësi i konviktit është (me leje) ai duhet të lajmërohet tek udhëheqësi i sektorit të sigurimit”, tha drejtori Sfishta.
Drejtori i Qendrës së Studentëve, shprehet i sigurt se në rast se ndonjë student do të deponojë ankesë në drejtori për refuzimin e tyre nga rojet edhe përkundër lejes së lëshuar, do të merren masat adekuate ndaj rojeve dhe rastet sigurt nuk do të përsëriten.
“Në momentin që lajmërohet rasti sipas procedurës së cekur më lart, ne ndërmarrim veprimet e nevojshme dhe e njëjta nuk mund të përsëritet”, tha drejtori i Qendrës së Studentëve.
Sfishta deklaratën e tij për Gazetën InLajmi e ka përfunduar duke thënë së masat nga Qendra e Studentëve merren duke zbatuar në përpikëri procedurat ligjore.
“Masat nga Qendra e Studentëve merren konform procedurave ligjore dhe rregulloreve në fuqi vërejtje gojore me shkrim, vërejtje me shkrim dhe për shkelje të rënda Komision Diciplinor”, përfundoi Sfishta. Arjanita Osmanaj /InLajmi/
