Deputeti i LDK-së, Armend Zemaj, ka adresuar kritika të shumta në adresë të qeverisjes me theks ndaj mosangazhimit në përmirësimin e sektorit shëndetësor, derisa nuk e përjashtoi në këtë rast as edhe përgjegjësinë e ministrit aktual Arben Vitia për situatën në sektorin më të ndjeshëm, raporton InLajmi.
Këto deklarata Zemaj i bëri në Komisionin për Shëndetësi të Kuvendit ku edhe raportoi ministri Vitia, ndërsa theksoi se është e pafalshme që nuk kemi asnjë raport e aq më pak nuk kemi as edhe një ligj të miratuar për sektorin shëndetësor.
Ai u shpreh se këto 2 vjet do të donin t’i harronin, por është e pamundur për shkak të, siç tha, problemeve të shumta në shëndetësi.
“Asnjë ligj bazik nuk ka ardhur për 2 vjet dhe se jemi duke hyrë në muajin e 3-të dhe nuk e dimë se si është gjendja. Nuk po kemi material të shqyrtojmë më dhe është e pafalshme që nëse kemi 30 muaj dhe nuk e kemi së paku një ligj dhe të ulemi të punojmë”, deklaroi Zemaj.
Ndonëse ishte dorhëhequr nga posti i ministrit të shëndetësisë, Vitia ia kujtoi atij se e kishte lënë udhëheqjen në pikun e pandemisë, kurse theksoi se puna në institucionin privat nuk la shije të mirë.
“Ju jeni larguar në pikun e pandemisë, ka ardhë një ministër tjetër që për një vit ka mbajtur atë pozitë, e më pastaj është larguar duke e lënë një letër të keqe duke thënë se qeveria Kurti ka lënë forma të korrupsionit. Detyra juaj në një institucion privat nuk ka lënë shije të mirë. Këto janë të meta të prodhuara gjatë kësaj kohe. E përmendet vërshimin, pse nuk ka dhënë dikush dorëheqje, sepse edhe më herët ka pasur vërshime por jo kështu”, tha Zemaj.
Për të dëshmuar se situata në sektorin e shëndetësisë është kaotike, deputeti Zemaj përmendi edhe rastin e foshnjës në Pejë e cila u “hesht” dhe nuk u “ndëshkua” askush.
“Tentitiva për ta fshehur rastin e foshnjës në Pejë që askush nuk ka dhënë përgjigje dhe rasti i vrasjes së një nëne të pafajshme, askush nuk ka dhënë dorëheqje”, tha Zemaj.
Zemaj u interesua edhe për funksionimin e Komisioni ekzekutiv për shëndetësi, ndërsa kërkoi të dijë nëse kryeministri ia ka bartur kompetencat ministrit.
Me disa kritika të Zemajt u pajtua edhe ministri Vitia, ndërsa vuri në theks arsyen e themelimit të Komisionit në fjalë për çka tha se kryeministri Kurti me këtë komision ka dashur të tregojë se shëndetësia është prioritet i kësaj qeverie.
Për më tep֝ër Vitia shpalosi disa nga prioritetet e tij si ministër, me theks parandalimin e ikjes së mjekëve nga Kosova. /InLajmi/
