Numri i vdekjeve nga tërmeti në Turqi dhe Siri i ka kaluar 37 mijë, teksa shpresat janë drejt fundit për gjetjen e të mbijetuarve të tjerë.
Të paktën 31.643 njerëz kanë vdekur në juglindje të vendit.
Më shumë se 4.400 njerëz kanë vdekur në Sirinë veriperëndimore të kontrolluar nga rebelët, sipas agjencisë së ndihmës së OKB-së, OCHA.
Të paktën 1.414 njerëz kanë vdekur në zonat e kontrolluara nga forcat e al-Assad, sipas zyrtarëve shëndetësorë.
Ndonëse plagët e tërmeteve në Siri dhe Turqi janë ende të pambyllura dhe numri viktimave vijon të rritet nga ora në orë, rimëkëmbja e qyteteve të rrafshura është një sfidë tjetër për qeverinë dhe autoritetet turke.
Në një vlerësim paraprak të Konfederatës Turke të Ndërmarrjeve dhe Biznesit, tërmetet shkatërruese do t’i kushtojnë plot mbi 75 miliardë euro, një shifër kjo e paimagjinueshme të përballohet e vetme.
Sipas të dhënave zyrtare, 10 provincat e shkatërruara përbëjnë 15% të popullsisë së Turqisë dhe prodhojnë 10% të PBB-së së saj.
Konfederata vlerëson se më shumë se 60.3 miliardë euro do të nevojiten për riparimin dhe rindërtimin e shtëpive dhe infrastrukturës, shkruan AFAD.
Presidenti Tajip Erdogan premtoi gjatë një vizite në zonat e dëmtuara se do të rindërtojë të gjitha shtëpitë brenda një viti, por fillimisht do të përballet me koston e strehimit të mijëra personave të mbetur pa shtëpi, transmeton Reporteri.
Aktualisht, një pjesë e mirë e personave që kanë mbetur pa një strehë mbi kokë janë dërguar në hotele në zonat turistike.
