Rreth 140 pjesëtarë të komuniteteve joshumicë kanë aplikuan në konkursin e Policisë së Kosovës, për t’u bërë pjesë e stafit në pjesën veriore të vendit, të banuar me shumicë serbe.
Lajmin e kanë konfirmuar nga Policia e Kosovës.
“Deri më tani ka pasur mbi 140 kandidatë të interesuar për aplikim nga komunitetet pakicë si serbë, boshnjakë, turq, ashkalinj, egjiptian dhe romë”, thuhet në përgjigjen e policisë.
Konkursi u hap pas dorëheqjeve të mbi 560 zyrtarëve policorë në veri, në shenjë kundërshtimi ndaj vendimit të Qeverisë së Kosovës për të nisur procesin për ri regjistrimin e makinave me targa të paligjshme serbe.
Për t’i plotësuar ato vende nuk po përjashtohet as kthimi i atyre që kanë dhënë dorëheqje.
E gjithë kjo varet në bisedime që mund të ndryshojnë kahjen.
Kështu thotë ish-ministri i punëve të brendshme, Ekrem Mustafa.
“Sa i përket konkursit, në bisedime ata po kërkojnë që me i kthy policët që e kanë dorëzuar mandatin. Në bisedime varet se si e vendosin këtë problematikë. Unë e di që është numër i vogël i policëve që kanë aplikuar, zakonisht ka qenë kusht që me apliku sa më shumë minoritete por s’kanë aplikuar sepse kanë pasur trysni me apliku. Ata nuk duhet me i kthy, por bisedimet ndërrojnë edhe kahjen reale të mundësive që i ka Qeveria e Kosovës”, deklaron Mustafa.
Por nëse merret një vendim i tillë, Mustafa thotë se nuk është e ligjshme.
Ai thotë se nuk do të kishte qenë kredibile për Policinë e Kosovës.
“Nuk është e ligjshme, sepse organet e sigurisë duhet me qenë kredibile, por bisedimet, negociatat që kanë mu bë për zgjedhjen e statusit final, nuk dihet çka vjen aty. Mundësia është, nëse nuk plotësohet i aplikuesve mundësia është me i rihap konkursi, nuk është jo e ligjshme, por nuk do të thotë që nuk kanë me arrit marrëveshje që me i kthy policët që e kanë dorëzuar mandatin”, shprehet Mustafa.
Rikthimi i tyre, assesi nuk duhet të lejohet, pasi që mund të organizojnë prapë veprime të njëjta.
Kështu thotë për Front Online, njohësi i sigurisë, Bedri Elezi.
“Sa i përket situatës së sigurisë, këta zyrtarë kanë qenë pjesë të grupeve kriminale të cilët kanë rrezikuar jetën e qytetarëve të Republikës së Kosovës, sidomos në veriun e Mitrovicës, kanë rrezikuar jetën e zyrtarëve të Eulexit dhe po ashtu zyrtarë të policisë së Kosovës, atëherë kemi të bëjmë me vepra të rënda penale që nuk është, absolut nuk vjen në shprehje mundësia e rikthimit të tyre në detyrë, por që në fakt duhet të ndërmerren masa ndaj tyre”, deklaroi Elezi.
Serbët e kanë kushtëzuar kthimin e tyre në institucione duke kërkuar nga Qeveria e Kosovës që ta formojë Asociacionin e komunave me shumicë serbe.
Themelimi i Asociacionit, muajve të fundit, edhe bashkësia ndërkombëtare ka rritur trysninë ndaj Kosovës që të zbatohet kjo marrëveshje.