Shqetësuese në Kosovë po vazhdojnë të mbesin shifrat e larta të aksidenteve të trafikut, të cilat jo rrallëherë përfundojnë edhe me fatalitet, shkruan InLajmi.
Thirrjet e Policisë së Kosovës për kujdes të shtuar dhe respektim të rregullave të trafikut po hasin në “vesh të shurdhër”, e kjo vërehet qartë nga shifrat e aksidenteve nga viti në vit.
Sipas të dhënave të Policisë së Kosovës dërguar për InLajmin, vetëm gjatë muajit janar kanë ndodhur 1.549 aksidente trafiku në total, nga to 5 me fatalitet, ndërsa 621 aksidente kanë përfunduar me të lënduar.
Duke i krahasuar këto shifra të vitit 2023 me ato të vitit 2022, shifrat janë përsëri të larta, pasi vetëm në janar të vitit të kaluar kanë ndodhur 1.618 aksidente.
Policia e Kosovës shpreh vazhdimisht shqetësimin lidhur me numrin e madh të aksidenteve në trafik, ku si pasojë janë lënduar qindra persona.
Shkaqet janë të ndryshme por sigurisht se faktori njeri është më i shpeshtë, pasi siç dihet nuk janë duke u respektuar rregullat e përgjithshme në trafik, nga manipulimi i pasigurtë me automjete, tejkalimi i shpejtësisë, mosmbajtja e distancës, mosrespektimi i shenjave të trafikut dhe mospërshtatja e kushteve të rrugës, si dhe përdorimi i shpeshtë i telefonave mobil, vozitja nën ndikimin e alkoolit, substancave narkotike, ndikimi i lodhjes apo pagjumësisë, trajnimi joserioz gjatë dhënies së provimit për shofer, por duke mos munguar as faktori rrugë dhe automjet ngase akoma në shumë vende mungojnë shenjat e komunikacionit dhe veturat e vjetra me mangësi të shumta teknike, ku infrastruktura është problematike dhe drejtuesit e mjeteve janë të pakujdesshëm gjatë vozitjes./InLajmi/
