Numri i të vdekurve si pasojë e tërmetit që goditi Turqinë dhe Sirinë të hënën e kaluar, ka arritur në të paktën 34.179.
Të vdekur në Turqi janë konfirmuar 29.605, ka bërë të ditur të dielën qendra turke koordinuese.
Në anën tjetër në Siri janë konfirmuar 4.574. E aty përfshihen mbi 3.160 të vdekur në veriperëndim të Sirisë që nuk kontrollohet nga qeveria siriane.
Jugu i Turqisë dhe veriu i Sirisë 7 ditë më parë u goditën nga 2 tërmete të fuqishme prej 7.8 magnitudë dhe 7.6. E pas këtyre 2 tërmeteve gjatë tërë javës janë regjistruar qindra dridhje tjera më të vogla të tokës.
Ambasadorja amerikane në OKB, Linda Thomas-Greenfield të dielën i bëri thirrje Këshillit të Sigurimit, të miratojë 2 pika shtesë për dërgimin e ndihmave në pjesët e Sirisë që janë goditur nga tërmeti.
Konvoji prej 100 kamionëve me ndihma humanitare të Kombeve të Bashkuara janë futur të dielën në veriperëndim të Sirisë, përmes pikëkalimit kufitar të Turqisë Bab Al-Hawa, ka bërë të ditur zëdhënësi i UNOCHA, Madevi Sun-Suon.
Ndërkaq të shtunën në këtë pikëkalim janë futur në Siri edhe 20 kamionë tjerë me ndihma.
Presidentja e Komisionit Evropian, Ursula von der Leyen, ka premtuar se do të rrit ndihmën për Turqinë, derisa ky vend po lufton me pasojat e tërmeteve shkatërruese, përcjell Telegrafi.
Gjatë një bisede telefonike të zhvilluar të dielën, Von der Leyen i tha presidentit turk Recep Tayyip Erdgoan, se “Komisioni do të mobilizojë përpjekjet shtesë dhe do t’i përgjigjet pozitivisht kërkesës së re turke për kapacitete më të mëdha në veçanti dërgimin e tendave, ngrohëseve”
