Ministri i Punëve të Brendshme Xhelal Sveçla deklaroi se zyrtarët e Policisë së Kosovë kanë shkatrruar edhe laboratorin e 3 të drogës, përcjell InLajmi.
Sveçla deklaroi se këto grupe kriminale po i mbron, mbështet dhe kur ju duhet i orkestron Presidenti i Serbisë Vuçiq.
Më tej ai shtoi se asnjë qytetari në botë nuk mund të mbrohet nga narkodillerat dhe paramilitarët.
Postimi i plotë i tij:
Shkatërrohet dhe laboratori i 3 i drogës
Vlera e llogaritur e sasisë së lëndës narkotike dhe paisjeve është rreth 2.3 milionë euro.
Profili i atyre që e ushtrojnë këtë veprimtari kriminale në veri të vendit tonë është i qartë: Paramilitarë e narkodilera. Këta po i mbron, mbështet dhe kur ju duhet i orkestron Presidenti i Serbisë Vuciq dhe pas tij ministri i mbrojtjes Vuceviq dhe Petkovic.
Siç kemi thënë barrikadat e vendosura gjatë muajit dhjetor në 4 komunat e veriut të vendit në të vërtetë kanë mbrojtur drogën e jo qytetarët. Kanë mbrojtur grupet e krimit të organizuar dhe jo burrat e gratë të komunitetit serb shtetas të Kosovës. Ato kanë mbrojtur vetëm dhe vetëm fijet e krimit që dërgojnë në ndërtesën presidenciale të Serbisë, aty nga ku Vuciq dirigjon klanet kriminale për paratë e trafikut me të cilat më pas sulmon shtetin tonë në emër të të drejtave të qytetarëve.
Asnjë qytetari në botë nuk mund të mbrohet nga narkodillerat dhe paramilitarët.
Kjo kohë ka marrë fund. E drejta do të triumfojë edhe më herët se sa që e kanë paramenduar. /InLajmi/
