Viteve të fundit ka filluar të kthehet në shifër shqetësuese ikja e infermierëve nga Kosova, kjo për shkak të krizës ekonomike, papunësisë, pagave të ulëta e deri te ngritja e çmimeve, e cila veçse e ka rënduar edhe më shumë gjendjen ekonomike të tyre, duke i detyruar ata që të ardhmen të mos e shohin në vendin e tyre, por më larg, shkruan InLajmi.
Krahas krizës ekonomike, janë edhe pritjet e gjata për punësim që po i shtyjnë shumicën e personave që shkollimin ta kryejnë në Kosovë, e të ardhmen ta shohin në shtetet e tjera. Në dukje të parë është Gjermania, ajo e cila po i tërheq më shumë infermierët kosovarë, duke u ofruar atyre paga dhe kushte më të mira për jetesë.
I tillë është edhe rasti i infermieres nga Skenderaj, Vildane Osmanaj, e cila në një deklaratë për InLajmin postjerash tregoi arsyet se pse e ka lënë vendin e punës në Kosovë për të shkuar në Gjermani.
Osmanaj thotë se i është dashur të presë 18 vjet pas përfundimit të fakultetit për t’u punësuar si infermiere në Kosovë. Përveç pritjes së gjatë për punësim, arsyet kryesore që e kanë shtyrë infermieren nga Skenderaj të largohet në Gjermani ndërlidhen me pagat dhe kushtet më të mira për jetesë.
“Unë kam luftuar 18 vjet për një vend të punës si infermiere. Vendimi për t’u larguar nga Kosova nuk ka qenë i lehtë, por jam bazuar gjithmonë te pjesa që sa kam pritur unë për një vend pune, të mos presin edhe fëmijët e mi. Ne jemi detyruar që ta lëmë Kosovën për një të ardhme më të mirë për fëmijët tanë, pasi paga ime prej një infermiereje ka qenë e ulët në Kosovë saqë s’mund t’i mbuloja as shpenzimet për shkollimin dhe rritjen e fëmijëve”, tha ajo.
Osmanaj tregon se pavarësisht problemeve që ka hasur te gjuha, punësimi si infermiere në Gjermani i është ofruar më shpejt se sa në Kosovë.
“Kur kam ardhur në Gjermani nuk ka qenë e lehtë për shkak të gjuhës, por përparësi ka qenë shkolla që e kam kryer. Këtu pas një muaji kam filluar të punoj në një Klinikë dhe tani jam e kënaqur me punën që e bëj”, tha Osmanaj.
Si rasti i infermieres nga Skenderaj ka edhe plot të tjerë, të cilët prespekivën po e shohin në Evropë e jo në Kosovë, e këtë e tregojnë edhe shifrat nga Oda e Infermierëve të Kosovës.
Sipas të dhënave nga Oda e Infermierëve të Kosovës, në 2 vitet e fundit janë larguar 878 infermierë nga Kosova.
Ky “vrull” largimesh duket se po vazhdon edhe në vitin 2023, i cili veçse ka filluar, por siç duket nuk po u jep shpresë infermierëve kosovarë për kushte dhe jetesë më të mirë, e këtë e tregojnë edhe shifrat e muajit janar nga Oda e Infermierëve të Kosovës.
Kryetari i Odës së Infermierëve të Kosovës, Naser Rrustemi, theksoi se këto shifra të ikjes së infermierëve nga Kosova mund të jenë shumëfish më të mëdha.
“Në vitin 2021 e kanë lëshuar vendin mbi 140 infermierë. Në vitin 2022 janë 738 infermierë, të cilët e lanë vendin e punës. Këtë shifër e kemi nga infermierët që kanë nxjerrë vertetime për mosshkelie të kodit etik ndërkaq ky numër mund të jetë shumëfish më i madh, pasi ka shumë infermierë që shkojnë përmes agjencive të ndryshme dhe në forma të ndryshme. Për muajin janar të 2023 janë 36 infermierë që janë larguar nga Kosova”, tha Rrustemi për InLajmin.
Rrustemi derisa tregoi për arsyet që po i nxisin infermierët të largohen nga vendi theksoi se shpresa që ata të kthehen është e vogël.
“Kushtet e punës, pagat, jokompetencat e duhura në bazë të përshkrimit të vendit të punës, kontratat e të gjitha këto janë arsyet kryesore, të cilat e kanë nxitur ikjen e infermierëve nga Kosova. Infermierët nuk po shohin një prespektivë në Kosovë. Edhe nëse 1500 euro ua bëjnë rrogën, ata nuk do të kthehen në asnjë moment”.
Nga ana tjetër, Federata e Sindikatave të Shëndetësisë së Kosovës bën të ditur se në institucionet publike përgjatë viteve 2021-2022 janë punësuar rreth 300 infermierë.
Këtë “trend” të ikjes së infermierëve nga Kosova e shohin mjaft shqetësuese nga kjo federatë, pasi siç theksojnë ata, ky trend do të thellojë edhe më shumë garën mes sektorit privat dhe publik për shkak të mungesës së infermierëve që do të paraqitet përgjatë viteve në vijim.
“Trendi i ikjes së infermierëve do të sjellë shëndetësinë kosovare në një garë të fortë mes sektorit publik dhe privat për shkak të mungesës se madhe të infermierëve. Poashtu infermieret që do të mbesin këtu do të jenë të mbingarkuarë me punë sikurse tani, ku ka reparte ku një infermier kujdeset deri në 30 pacientë dhe cilësia e shërbimeve nuk do të mund të jetë e mirë”, thuhet në përgjigjen e kësaj federate për InLajmin.
Federata e Shëndetësisë së Kosovës thotë se Qeveria e Kosovës duhet të punësojë infermierë shtesë dhe t’ua përmirësojë atyre kushtet e punës, përfshirë këtu edhe ngritjen e pagës.
“Qeveria e Kosovës duhet që të punësojë infermierë shtesë të paktën 1.000 infermierë vetem këtë vit, që një infermier të mos kujdeset për më shumë se 10 pacientë, të ngrisë pagat, të punësojë ndimësinfermiere, si dhe t’u ofrohen atyre kushte më të mira për punë dhe t’u sigurohet ambient pune pa presion”.
Ndryshe, ikja e stafit shëndetësor nga Kosova po cilësohet nga ekspertë si problem kombëtar që Kosova duhet ta trajtojë me urgjencë. Shqipe Vishaj/InLajmi/
