Varfëria në Kosovë po vazhdon të rritet nga viti në vit, duke e bërë më alarmante gjendjen socio-ekonomike në Kosovë. Që pas pandemisë e deri te lufta në Ukrainë kudo në botë inflacioni mori hov, duke goditur më së shumti gjendjen ekonomike të vendeve të varfëra, e imune ndaj kësaj situate nuk është as Kosova, e cila veçse është thelluar në krizë ekonomike, shkruan InLajmi.
Sipas të dhënave nga revista “Global Finance”, për vitin 2022, Kosova del të jetë shteti më i varfër në rajon, duke u renditur në vendin e 105-të në botë.
Gjendja e rëndë ekonomike, papunësia dhe inflacioni e kanë shtuar edhe numrin e familjeve që marrin asistencë sociale, të cilët në pamundësi për të siguruar të ardhura të mjaftueshme presin ndihmën nga shteti.
Sipas të dhënave nga Agjencia e Statistikave të Kosovës, vetëm për vitin 2021 ishin 25.985 familje të cilët morën asistencë sociale. Ndërsa për vitin 2022 numri i familjeve që morën asistencë sociale ishte 22.980, shifra këto dukshëm të larta dhe mjaft shqetësuese për vendin tonë.
Numrin më të madh të familjeve të cilat kanë përfituar nga skema e ndihmës sociale përbën Komuna e Mitrovicës, e cila në janar të vitit 2021 kishte 2.399 familje derisa për vitin 2022 kishte 2.357 familje përfituese të skemës sociale.
“Numri i familjeve që përfitojnë nga asistenca sociale prej muajit dhjetor 2021 ishte 25.985 familje, derisa numri me i madh ishte ne komunen e Mitrovices”, thuhet në të dhënat e ASK-së dërguar për InLajmin.
Përveç Mitrovicës, numër të lartë të familjeve me gjendje të rëndë ekonomike përbëjnë edhe komunat si Peja, Drenasi, Ferizaji, Lipjani, Prishtina e të tjerat, çka edhe flasin shifrat e paraqitura në tabelë përgjatë vitit 2022.
Duke parë situatën e rënduar ekonomike në vend mbase edhe mund të ketë familje që mund të bien në asistencë sociale për shkak të gjendjes së brishtë ekonomike dhe për këtë duhet të përkujdeset shteti, i cili siguron të dhënat nga teren për gjendjen socio-ekonomike të qytetarëve të saj.
Lidhur me numrin e përfituesve të asistencës sociale dhe rivlerësimin e skemës sociale për vitin 2023, redaksia e Gazetës InLajmi ka kërkuar informacione nga Ministria e Punës dhe Transfereve, mirëpo të njëjtët nuk janë përgjigjur kërkesës sonë pavarësisht pritjes së stërgjatur për përgjigje.
Ndryshe, Qeveria e Kosovës vitin e kaluar në kuadër të Pakos për Ringjallje Ekonomike ka ndarë nga 100 euro shtesë për përfituesit e asistencës sociale, mirëpo nga analistët e opozita është cilësuar si “lëmoshë” dhe jo zgjidhje afatgjate. Shqipe Vishaj /InLajmi/
