Në Kosovë ka trend të vazhdueshëm të rënies së natalitetit, këtë e thonë të dhënat e Agjencisë së Statistikave të Kosovës.
Duke folur për këtë temë, specialisti i shëndetit publik, Ilir Hoxha, tha se Qeveria Kurti është duke ndërmarrë hapa konkret në adresimin e kësaj çështje.
“Qeveria aktuale është duke iu qasë kësaj në mënyrë proaktive, ligj për të cilin u fol në diskutimet fillestare është një nga shenjat se janë duke u adresuar çështjet, tjetra janë shtesat për fëmijë që janë aplikuar gjatë vitit të kaluar, pra e kemi për herë të parë një qeveri me masa proaktive në adresimin e fenomenit të zvogëlimit të natalitetit”, tha Hoxha.
Por sipas Hoxhës ndikimi i institucioneve në zvogëlimin e fenomenit të natalitetit është i limituar, shkruan KlanKosova
“Duke i pasur parasysh trendet është e vështirë të menaxhohet, migrimi është një nga fenomenet, por edhe qasja në shëndetin reproduktiv është fenomen tjetër që shkon paralel dhe që ndoshta nuk jep rezultate që ne duam si shoqëri, në kuptimin që zvogëlohet numri i popullatës, numri i njerëzve që mund të jenë aktiv në tregun e punës, por shenjat janë pozitive, ka politika të menduara drejt adresimit të problematikave siç është nataliteti, shtesat për fëmijë, ligji që është në diskutim, për mua janë hapa konkret për dallim prej përpara që ka qenë një qasje improvizuese në politikat shëndetësore”, tha Hoxha.
