Rastet me grip sezonal dhe me virus Covid-19 veçse kanë filluar të shtohen këtë muaj në vendin tonë, e madje janë kthyer në shqetësimin kryesor të qytetarëve, të cilët vazhdimisht ankohen nga simptoma të gripit dhe ftohjes në këto ditë të ftohta, shkruan InLajmi.
Sipas të dhënave nga Shërbimi Spitalor, Klinik dhe Universitar i Kosovës, deri më tani janë 90 raste aktive me Covid-19, derisa jo më larg se një javë në raportin e SHSKUK-së thuhet se një person ka vdekur nga Covid-19, çka edhe shton shqetësimin për rikthimin e këtij virusi.
Mirëpo ajo çka përbën konfuzitet te qytetarët është edhe ngatërrimi i simptomave të Covid-19 me ato të gripit sezonal për shkak të vështirësisë për t’i dalluar dhe përceptimit si simptoma pothuajse të njëjta nga qytetarët.
Për gripin sezonal dhe virusin Covid-19 ka folur për Gazetën InLajmi, infektologu Hamdi Ramadani, i cili deklaroi se rritja e rasteve të gripit sezonal veçse ka qenë e pritshme, pasi sezoni i dimrit siç theksoi ai, është karakteristik për përhapjen e këtyre sëmundjeve epidemiologjike.
“Tash ditëve të fundit veçse janë rritur rastet me grip sezonal. Normalisht që ky shtim i rasteve me grip sezonal ka qenë e pritshme për faktin se vetë sezona, kryesisht muaji dhjetor, janar dhe shkurt janë karakteristikë epidemiologjike e gripit sezonal. Çdo herë në stinën e dimrit presim shumë sëmundje akute infektive e respitarorike, duke filluar prej gripit sezonal e sëmundjeve të tjera”, tha Ramadani.
Infektologu Ramadani theksoi se qytetarët duhet të vaksinohen në mënyrë që të bëhen më “imunë” ndaj gripeve sezonale, derisa njoftoi se interesimi i qytetarëve për t’u vaksinuar këtë vit nuk është i kënaqshëm.
Ramadani tha se shifrat e Covid-19 dhe gripit sezonal mund të zvogëlohen vetëm nëse qytetarët vetëdijësohen dhe fillojnë të vaksinohen.
“Tash e shumë vite vendi ynë e ka vaksinën kundër gripit sezonal, mirëpo interesimi i qytetarëve për t’u vaksinuar nuk ka qenë i kënaqshëm. Gripi sezonal si sëmundje epidemike e atakon apo sulmon çdo të rinj apo të rritur, andaj vaksina kundër tij do të mund të ishte si një mbrojtje kundër gripit sezonal. Kështu që sa më shumë që qytetarët vaksinohen kundër gripit sezonal edhe numri i rasteve do të pakësohej. Qytetarët duhet të vetëdijësohen dhe të fillojnë vaksimin kundër gripit sezonal”, tha ai.
Gjithashtu Infektologu deklaroi se është krijuar një konfuzitet te qytetarët për simptomat e gripit sezonal dhe virusit Covid-19, derisa theksoi se mënyra më e mirë për t’i dalluar këto simptoma është vizita te një profesionist shëndetësor ose kryerja e testeve laboratorike.
“Është krijuar një konfuzitet te qytetarët për simptomat e gripit sezonal dhe Covid-19, mirëpo qytetarët duhet të vizitojnë një profesionist shëndetësor që të evidentojnë nëse është grip sezonal apo Covid-19. Në disa raste më të qartë e bëjnë edhe analizat edhe testet laboratorike, pasi e identifikojnë saktë se me çfarë sëmundje epidemiologjike ankohet pacienti”, tha Ramadani për InLajmin.
Ndryshe, Ministria e Shëndetësisë ka bërë vazhdimisht thirrje që qytetarët të vaksinohen të kenë kujdes të shtuar gjatë kësaj sezone kur gripi sezonal dhe Covid-19 është në rritje. /InLajmi/
