Kompania Rajonale e Ujësjellësit “Prishtina” ka bërë apel te qytetarët që të bëjnë kujdes të shtuar për instalimet dhe ujëmatësit në shtëpitë e tyre për shkak të ngrirjes që mund të marrin nga temperaturat e ulëta, përcjell InLajmi.
Zyrtarë nga kjo kompani këshillojnë qytetarët që të gjejnë valvolën kryesore të mbylljes së ujit dhe të bëjnë izolime në pusetat ku kanë të vendosur matësin e ujit që të mos vijë deri te ngrirja.
Kompania e Ujësjellësit paralajmëron se tubacionet dhe ujëmatësit, mund të ngrihen brenda pak orëve nga fillimi i motit me temperatura të ulëta, nëse ata janë të ekspozuar direkt ndaj ajrit të ftohtë.
Postimi i plotë nga Kompania Rajonale e Ujësjellësit:
Kujdesuni për instalimet dhe ujëmatësit në banimet tuaja
Prishtinë, 5 shkurt – Të nderuar konsumatorë të Kompanisë Rajonale të Ujësjellësit “Prishtina” , në këtë kohë me temperatura të ulëta ju lutemi që, paraprakisht të keni kujdes gjatë vendosjes së ujëmatësve duke filluar nga sot
Ju paralajmërojmë se, tubacionet / instalimet brenda pronës tuaj përfshirë këtu edhe ujëmatësit, mund të ngrihen brenda pak orëve nga fillimi i motit me temperatura të ulëta, nëse ata janë të ekspozuar direkt ndaj ajrit të ftohtë.
Ju jeni përgjegjës për mbrojtjen e tubave të ujit dhe të ujëmatësve (të brendshëm ose të jashtëm / në afërsi të banimit) nga ajri i ftohtë dhe era. Parandalimi i ngrirjes së ujëmatësve dhe tubave që mos të vijë deri te ngrirja është shumë më e lehtë sesa zëvendësimi i tubave që ngrijnë dhe shpërthejnë. Për fat të mirë, kjo është relativisht e lehtë për t’u bërë, me ç’rast ne do t’ju ndihmojnë të parandaloni dëmtimet, shpenzimet dhe vështirësitë që mundeni të ballafaqoheni në situatat kur tubat dhe ujëmatëset janë ngrirë.
Si të veproni:
Gjeni valvolën kryesore të mbylljes së ujit p.sh në bllokun e banimit ( puseta me ujëmatësin kryesor ) apo në shtëpitë private. Tregoni të gjithë anëtarëve të familjes se si të mbyllni atë në rast të një tubi i cili mund të shpërthejë ose emergjencë të ngjashme. Në banimet kolektive, banorët duhet të dinë vendndodhjen e pusetës me ujëmatës dhe valvolën për ndërprerjen, poashtu dhe valvolen për ndërprerje të rrjetit të hidrantëve të brendshëm në rast se keni shpërthim të tubit të hidrantëve.
Apelojmë që në katet e përdhesës ku vertikalja e furnizimit është më shumë e ekspozuar në ajrin e ftohtë dhe mundësitë e rrjedhjes janë potenciale, andaj ju lutemi të merrni masa dhe izoloni qe të mos vijë deri te ngrirja. Apelojmë te konsumatorët që të bëjnë izolime në pusetat ku kanë të vendosur matësin e ujit që të mos vijë deri te ngrirja. Tubat që kanë më shumë gjasa të ngrihen janë ata që janë në muri të pa-izoluar mirë, garazhe, bodrume dhe ata të vendosur cektë nën sipërfaqen e tokës. Shtoni izolimin në mure të jashtme kudo që të jetë e mundur dhe mbyllni (vishni) gypat me izolim në garazhe dhe bodrume si dhe bëni izolim të brendshëm ujëmatësit me materiale që pengojnë ajrin e ftohtë. /InLajmi/
