Presidentja e Kosovës Vjosa Osmani, ka përkujtuar 23-vjetorin e vrasjes së 10 shqiptarëve në Veri të Mitrovicës, në mesin e të cilëve kishte fëmijë, gra e pleq, përcjell InLajmi.
Sipas Osmanit, qytetarët e vrarë nga bandat e armatosura serbe mishërojnë kujtesën dhe nevojën për drejtësi.
Presidentja thotë se drejtësia duhet të jetë synim i vazhdueshëm që autorët e këtyre vrasjeve të vihen para përgjegjësisë.
Postimi i plotë i saj:
Dhjetë qytetarë shqiptarë të vrarë, në mesin e të cilëve fëmijë, gra e pleq nga banda të armatosura serbe, 25 të plagosur ndërmjet 3-4 shkurtit të vitit 2000, sikurse edhe 1664 familje të dëbuara me gati 12 mijë anëtarë nga pjesa veriore e Mitrovicës, mishërojnë kujtesën dhe nevojën për drejtësi.
Në 23-vjetorin e ditëve të tmerrit në këtë pjesë, thirrja për drejtësi është nderim për të vrarët, të plagosurit dhe të dëbuarit.
Qoftë i përhershëm kujtimi për viktimat e drejtësia synim i vazhdueshëm deri në vënien e autorëve para përgjegjësisë! /InLajmi/
