Profesori universitar, Arben Fetoshi thotë se i gjithë spektri politik do të duhej të ulej të krijonte konsensus të plotë politik sa i përket çështjes së Asociacionit.
Fetoshi tha se pushteti dhe opozita do të duhej të demonstronin unitet të plotë nacional në betejën me Serbinë.
“Kam përshtypje që ne si shtet kemi treguar sjellje jo shumë adekuate sa i përket një obligimi të marrë në kuadër të procesit të dialogut. Ajo çka ka qenë për mua dhe vazhdon të jetë brengosëse është një kakofoni pozitë-opozitë lidhur me Asociacionin pa u munduar dhe pa u vetëdijesuar për domosdoshmërinë që i gjithë spektri politik të ulej dhe të krijonte konsensus të plotë politik sa i përket çështjes së Asociacionit dhe të demonstronte unitet të plotë nacional në betejën me Serbinë”, ka deklaruar ai.
Për këtë çështje, Fetoshi u shpreh se spektri politik ka dështuar, shkruan TëVë1.
“Në këtë pikë spektri politik ka dështuar dhe tani përballemi me situatat kur deri më tash kemi rezistencë të fortë nga ana e Qeverisë si kauzë kryesore e LVV-së dhe në anën tjetër kemi sinjalizimin e lëvizjes së këtij pozicioni të Kurtit nga dje, e që mua më bën optimist që të rikthehemi domosdoshmërisë për konstruktivitet me qëllim që ta rikthejmë koordinimin e plotë me SHBA-në, në qoftë se duam t’i shërbejmë vendit. Përndryshe mendojë se po rrezikojmë pa nevojë që asociacionin ta zmadhojmë në përmasa të rrezikshme për Kosovën në vend se duke qenë bashkë ta reduktonim atë në një organizatë që do t’i shërbente shqetësimeve dhe brengave që mund të kenë qytetarët serb në Kosovë”, përfundoi ai
