Partia Demokratike e Kosovës ka bojkotuar seancën e Kuvendit të Kosovës si shenjë revolte për koeficientin e ri të pagave të publikuar këtë të mërkurë nga Qeveria e Kosovës, raporton InLajmi.
Shefi i Grupit Parlamentar të PDK-së Albelard Tahiri, tha se partia e tij është e zhgënjyer me koeficientin e ri të pagave, pasi siç theksoi ai, koeficienti i ri veçse e thellon edhe më shumë mjerimin në vendin tonë.
“Ne si Grup Parlamentar i Partisë Demokratike të Kosovës shprehim zhgënjimin tonë me përcaktimin e koeficientit të ri të pagës nga Qeveria e Kosovës. Ky është një koeficient i mjerimit sepse e thellon edhe më shumë varfërinë në vendin tonë. Ky koeficient është mbajtur fshehur nga kryeministri i vendit për mbi 85.000 zyrtarë publikë. Gjithashtu ky koeficient i demotivon të rinjtë dhe të rejat, të cilët duan të jenë pjesë e administratës shtetërore”, tha Tahiri.
PDK kërkoi nga Qeveria e Kosovës që të rishqyrtojë edhe një herë koeficientin e ri të pagave.
“Ne kërkojmë që Qeveria e Kosovës ta rishqyrtojë këtë çështje sepse është definitivisht e rrit mjerimin në vend tonë. Prandaj si grup parlamentar në shenjë revolte në përcaktimin e këtij koeficienti nuk do të vazhdojmë këtë seancë”, tha Tahiri. /InLajmi/
