Ish-pjesëtari i Policisë së Kosovës Eris Jashari, është futur në grevë duke shprehur kështu pakënaqësinë për mungesën e sigurimit shëndetësor dhe jetësor për policët, raporton InLajmi.
Jashari u bëri thirrje deputetëve që të rregullojnë me ligj sigurimin shëndetësor për policët e Kosovës.
“U bëj thirrje të gjithë deputetëve pa dallim etnie, partie që ta rregullojnë me ligj sigurimin shëndetësor dhe jetësor për policët e Kosovës”, tha Jashari.
Tutje, ai njoftoi se ka dhënë dorëheqje nga Policia e Kosovës pikërisht për shkak të kushteve të këqija të punës.
“Unë kam punuar polic, prej 1 shkurtit pra nesër bëhen 11 vite prej që unë kam hi në Policinë e Kosovës si 19 vjeçar, ku kam punuar për 5 vite me plot krenari po them dhe me 4 korrik 2017 kam ofruar dorëheqjen prej Policisë së Kosovës, një ndër arsyet pse unë kam dhënë dorëheqje kanë qenë pikërisht kushtet e punës, të cilat në atë kohë veçse kanë qenë duke u përkeqësuar ditë e për ditë por assesi nuk ma ka marrë mendja që pas 6 viteve vjen puna edhe barazohet rroga ime që e kam marrë para 6 viteve në Policinë e Kosovës me rrogën që e marrë sot si punëtorë në sektorin privat e që kjo tregon se ku ka ngecur Policia e Kosovës”, tha Jashari. /InLajmi/
