Nënkryetari i LDK-së Lutfi Haziri, ka folur pas takimit që pati në Ambasadën amerikane në Prishtinë për të diskutuar për Asociacionin e komunave me shumicë serbe, përcjell InLajmi.
Haziri vlerëson se çështja e Asociacionit është kompetencë dhe përgjegjësi kushtetuese vetëm e institucioneve të Republikës së Kosovës, në radhë të parë e Qeverisë.
Tutje, ai thekson se orientimet e partisë së tij janë vetëm për një marrëveshje përfundimtare me njohjen reciproke në thelb të saj.
Postimi i plotë i tij:
Me ftesë të ambasadorit të SHBA-së në Kosovë, shkëlqesisë së tij Jeffrey Hovenier, sot kam marrë pjesë në emër të LDK-së në takim në të cilin konfirmova mbështetjen për procesin e dialogut të ndërmjetësuar nga BE-ja, me përfshirjen e plotë të SHBA-së.
Orientimet e LDK-së për një marrëveshje përfundimtare, ligjërisht të obligueshme, dhe me njohjen reciproke në thelb të saj, mbesin të pandryshueshme.
Në lidhje me Asociacionin, LDK-ja vlerëson se kjo çështje është kompetencë dhe përgjegjësi kushtetuese vetëm e institucioneve të Republikës së Kosovës, në radhë të parë e Qeverisë. /InLajmi/
