Komuna e Prishtinës ka njoftuar se janë riorganizuar planet e tarifimit për transportin publik, përcjell InLajmi.
Zyrtarë nga Komuna e Prishtinës njoftojnë se për të gjithë përdoruesit e rregullt, çmimi i biletës mujore nga 14.00 euro do të zbresë në 13.50 euro.
Mirëpo në këtë plan të ri janë përfshirë edhe biletat javore dhe ditore shumëpërdorimëshe, ku bileta ditore që përfshin udhëtime vajtje-ardhje pa limit përgjatë 24 orëve do të jetë me çmimin 0.80 cent, derisa bileta javore që përfshin udhëtime vajtje-ardhje pa limit në të gjitha ditët e javës do të jetë me çmimin 4.00 euro.
Ndërsa një biletë e rregullt autobusi, e cila mund të përdoret vetëm për një drejtim, do të ketë çmimin 0.50€.
Njoftimi i plotë nga Komuna e Prishtinës:
Të dashur qytetarë,
Komuna e Prishtinës në kuadër të Marrëveshjes së Kredisë mes Trafiku Urban Prishtinë dhe Bankës Evropiane për Rindërtim dhe Zhvillim (BERZh), me qëllim të përmirësimit të shërbimit të transportit publik dhe inkurajimit të qytetarëve për përdorimin e autobusëve, ka riorganizuar planin e tarifimit.
Për të gjithë përdoruesit e rregullt, çmimi i biletës mujore nga 14.00€ do të zbresë në 13.50€
Në anën tjetër, për t’iu përshtatur nevojave të të gjithë qytetarëve, kemi përfshirë në planin tarifor biletat javore dhe ditore shumëpërdorimëshe:
- Bileta Ditore përfshin udhëtime vajtje-ardhje pa limit përgjatë 24 orëve, me çmimin 0.80€
- Bileta Javore përfshin udhëtime vajtje-ardhje pa limit në të gjitha ditët e javës, me çmimin 4.00€
Një biletë e rregullt autobusi, e cila mund të përdoret vetëm për një drejtim, do të ketë çmimin 0.50€.
Kartelat javore dhe mujore mund t’i bleni në pikat e shitjes së Trafikut Urban:
📍 Kioska me logon e Trafiku Urban, prapa Objektit të Komunës së Vjetër (tek “Plepat”),
📍 Kioska me logon e Trafiku Urban, në lagjen Kodra e Diellit, (tek ”Banesat e Bardha”).
Ndërsa, Biletat Ditore 24 orëshe dhe ato me një drejtim, mund t’i bleni si zakonisht në autobus, duke u pajisur me kupon fiskal.
Ju njoftojmë që plani i ri tarifor do të aplikohet nga data 31 janar 2023. /InLajmi/
