Misioni i KFOR-it në Kosovë ka theksuar se është e rëndësishme që Kosova dhe Serbia të përmbahen nga provokimet dhe të kërkojnë zgjidhje përmes dialogut.
Në një intervistë për “European Western Balkans”, zyrtarë të saj kanë potencuar se KFOR vazhdon të ofrojë kornizën e sigurisë të nevojshme për dialogun e lehtësuar nga BE-ja për normalizimin e marrëdhënieve ndërmjet Beogradit dhe Prishtinës për të ecur përpara”.
“Me më shumë se 3.700 trupa të kontribuar nga 27 vende, duke përfshirë aleatët dhe partnerët e NATO-s, KFOR-i mbetet plotësisht i fokusuar në zbatimin e përditshëm të mandatit të tij – bazuar në Rezolutën 1244 të Këshillit të Sigurimit të OKB-së të vitit 1999 – për të siguruar një mjedis të sigurt dhe lirinë e lëvizjes për të gjitha komunitetet në Kosovë”, thuhet nga zyrtarë të KFOR-it.
“Heqja e barrikadave u bë me përpjekjet intensive të aleatëve të NATO-s dhe Bashkimit Evropian për të zbutur tensionet, me mbështetjen kryesore nga KFOR-i dhe misioni i udhëhequr nga BE-ja për Sundimin e Ligjit. Demontimi i postblloqeve përfundimtare u krye në mënyrë të shpejtë dhe të sigurt për të shmangur incidentet dhe rreziqet e tjera për sigurinë lokale”.
Sipas KFOR-it, mjaft e rëndësishme është që të gjitha palët të përmbahen nga veprimet provokuese.
“Ajo që tani është e rëndësishme është që të gjitha palët të përmbahen nga veprimet provokuese dhe të kërkojnë më tej zgjidhje përmes dialogut. Ky është çelësi për sigurinë e qëndrueshme në Kosovë dhe për stabilitetin në të gjithë rajonin. KFOR-i vazhdon të ofrojë kornizën e sigurisë të nevojshme për dialogun e lehtësuar nga BE-ja për normalizimin e marrëdhënieve ndërmjet Beogradit dhe Prishtinës për të ecur përpara”.
Tutje, zyrtarë nga KFOR theksojnë se e mbështesin dialogun mes Kosovës dhe Serbisë.
“KFOR-i ka luajtur një rol kyç në zbutjen e tensioneve të fundit, mbetet jashtëzakonisht vigjilent dhe ka aftësi dhe personel për të vazhduar kryerjen e mandatit të tij, ndërsa komandanti i KFOR-it, gjeneralmajor Ristuccia mbetet në kontakt të ngushtë me të gjitha palët relevante”, u theksua nga Zyra e KFOR-it në Prishtinë. Për më tepër, NATO mbështet Dialogun Beograd-Prishtinë “si platforma kryesore për të gjetur një zgjidhje që respekton të drejtat e të gjitha komuniteteve dhe për të ndërtuar paqen dhe sigurinë e qëndrueshme në të gjithë rajonin”.
KFOR-i shton se i ka të gjitha burimet e nevojshme për të përmbushur misionin e tij, transmeton Klan Kosova.
“Komandanti i KFOR-it e bëri të qartë se KFOR-i është përgjegjës për ofrimin e një mjedisi të sigurt dhe të lirë të lëvizjes për të gjitha komunitetet që jetojnë në Kosovë, në mbarë Kosovën, në përputhje me mandatin e tij të OKB-së. Ai gjithashtu theksoi se KFOR-i i ka të gjitha resurset e nevojshme për të përmbushur misionin e tij. Për më shumë se 20 vjet, KFOR-i ka demonstruar se është në detyrën e tij, falë një qëndrimi të dukshëm, të shkathët dhe përshtatës në terren dhe paanshmërisë së tij në mbështetje të nevojave të të gjitha komuniteteve që jetojnë në Kosovë”, thanë zyrtarët e KFOR-it.
