Rinia Demokratike e Kosovës këtë të dielë ka mbajtur konventën e 7-të zgjedhore, në të cilën më shumicë votash kryetare u zgjodh Arbnora Salihu, përcjell InLajmi.
Këtë e ka bërë të ditur i pari i Partisë Demokratike të Kosovës, Memli Krasniqi i cili tha se këto zgjedhje, partia po nis një mandat të ri, por edhe një cikël të ri politik, që po shpërndahet në tërë Kosovën.
Ndërsa i pari i PDK-së nën slloganin “Ti Ki Za” ka bërë thirrje për angazhim, sidomos në këtë kohë kur migrimi është kthyer në masë të madhe në Kosovë ndërsa sipas tij është si pasojë e një qeverisjeje depresive.
Ndryshe Arbnora është 24 vjeç, ka diplomuar për Shkenca Politike në Universitetin e Prishtinës, ndërsa vijon studimet Master në drejtimin “Politika Publike dhe Menaxhimi”. Në zgjedhjet e fundit lokale në vitin 2021, ka fituar një vend në Kuvendin Komunal pa kuotë gjinore si asamblistja e re më e votuar.
Kujtojmë së deri më tani kryetar i Rinisë Demokratike të Kosovës, ishte Donjet Bislimi.
Postimi i plotë i tij:
Sot, në një konventë të mrekullueshme zgjedhore të Rinisë Demokratike të Kosovës, të 7 me radhë, kryetare është zgjedhur Arbnora Salihu nga qyteti i Ferizajt.
Suksesi i këtij procesi zgjedhor, inovativ në shume aspekte, te dixhitalizuar në secilën fazë e të finalizuar me votim elektronik, ku mbi 50 % e anëtarëve të Këshillit Drejtues janë zgjedhur vajza, pa kuotë, në përputhje me vizionin tonë 50/50 për barazi gjinore, është një momentum i shënuar për PDK-në.
Kjo frymë e re, ky cikël i ri politik që nisi sot në Rininë Demokratike të Kosovës, do të ketë mbështetjen time të plotë në veprimtarinë dhe vizionin e tyre për të ardhmen që dëshirojnë.
“Ti Ki Za”, përtej sloganit, është një thirrje për të rinjtë dhe të rejat e vendit tonë që të marrin përgjegjësi, të bashkohen, të kanalizojnë formimin e tyre intelektual dhe energjinë e pashtershme në transformimin e komunitetit, lagjeve dhe qyteteve të shtetit tonë.
Duke qenë ky misioni ynë, zëri i rinisë është çelësi për ta fituar këtë betejë me kohën.
Kosovën do ta kthejmë në vend ku jetohet me dinjitet, ku zëri i të rinjve nuk do heshtet kurrë dhe i cili ka një adresë kryesore – Partinë Demokratike të Kosovës!/InLajmi/
