Bota “online” ka marrë hov të përdorimit kohëve të fundit, mirëpo përveç anëve pozitive zhvillimi i teknologjisë përcillet edhe më sfida nga më të ndryshme, shkruan InLajmi.
E disa nga sfidat e botës “online” pa dyshim që mund te cilësohen edhe sulmet kibernetike.
Por çka janë këto sulme, sipas njohësve të kësaj fushe këto sulme janë përpjekje e hakerëve për të hyrë në një rrjet ose sistem kompjuterik, zakonisht me qëllim të ndryshimit, vjedhjes, shkatërrimit ose ekspozimit të informacionit.
E kjo “sfidë” e botës online duket se ka prekur ndjeshëm edhe shtetin e Kosovës, pasi statistikat flasin për rritje të numrit të rasteve të sulmeve kibernetike në vend.
Se ka rritje të këtyre rasteve e konfirmoi edhe Policia e Kosovës në një përgjigje me shkrim për Gazetën InLajmi.
Sipas Policisë së Kosovës gjatë vitit që lamë pas janë regjistruar 290 raste të sulmeve kibernetike në mbarë vendin.
Ndërsa në vitin 2021 sipas statistikave të Policisë në mbarë vendin ishin regjistruar rreth 187 raste të sulmeve kibernetike.
Ndryshe, këto sulme mund të synojnë një gamë të gjerë viktimash nga përdoruesit individualë tek ndërmarrjet apo edhe qeveritë. Libona Gegaj /InLajmi/
