Ministrja e Arsimit në Republikën e Kosovës, Arbërie Nagavci ka bërë të ditur se Ligji i Pagave nuk është ligj për rritjen e pagave, e kjo deklaratë e saj nxiti reagime të një pas njëshme si nga shoqëria civile ashtu edhe nga opizita, shkruan InLajmi.
Kjo deklaratë e Nagavcit, “këputi” shpresat e punëtoreve në sektorin publik të cilët edhe prisnin një rritje mbase edhe simbolike të pagave.
Ndaj deklaratës së ministres, reagon edhe deputeti i Partisë Demokratike të Kosovës, Bekim Haxhiu i cili tha se deklarimet se nuk do të ketë rritje të pagave janë “qasje e gabuar” e sidomos në këtë kohë kur Kosova po përballet me situatë të rënduar ekonomike.
Ai tha se deklarata e Nagavcit po i demotivon qytetarët për të jetuar në Kosovë.
“Qasja e ministres së Arsimit, Arbërie Nagavci në lidhje me mos rritjen e pagave për sektorin publik është tërësisht qasje e gabuar e sidomos në këtë 2 vjeçar në të cilin është rënduar situata ekonomike dhe është rritur tej mase inflacioni dhe kur çmimet e produkteve bazë janë rritur 100 %, e të vie ministrja e të thotë se nuk do të ketë rritje pagash ky është një demotivim i qytetarëve të Republikës së Kosovës”, tha për Gazetën InLajmi deputeti, Bekim Haxhiu.
Poashtu, Haxhiu theksoi se vendimi për mos ngritjen e pagave në kohë krize i shtynë edhe më shumë qytetarët ta braktisin vendin.
“Ky vendim është një shtytje për qytetarët e Kosovës që ta braktisin vendin e që në veçanti në vitin e fundit kemi pësuar ikje të madhe të të rinjëve nga vendi e që kjo vjen nga situtata e rënduar ekonomike, duhe të mirret seriozisht se nëse vazhdohet kështu mund të mbesim pa sektor të caktuar”, u shpreh Haxhiu.
Haxhiu tha se qytetarët janë ata që i japin kahje këtij vendimi, ndërsa rritje e pagave duhet të bëhet sepse situata ekonomike mund të rëndohet akoma më shumë.
“Qytetarët duhet të veprojnë në raport me pakënaqësit e tyre, kurse rritja e pagave duhet të bëhet duke u bazuar në rritjen e inflacionit dhe situatën ekonomike përndryshe situata ekonomike do bëhet akoma më e rëndë”, përfundoi ai. Arjanita Osmanaj /InLajmi/
