Kryeministri i vendit Albin Kurti, është deklaruar edhe një herë se është kundër Asociacionit të komunave me shumicë serbe, raporton InLajmi.
Kurti theksoi se Kushtetuta e Kosovës nuk e duron asociacionin njëetnik, prandaj si i tillë theksoi se asociacioni nuk do të pranohet.
“Tash po insistohet në një asociacion njëetnik, por këtë nuk e duron kushtetueshmeria e Republikës së Kosovës asociacionin njetnik. Ne mund të diskutojmë, mirëpo kushtetueshmeria e Republikës së Kosovës dhe pavarësia e shtetit tonë nuk e duron një asociacion. Prandaj ata që e kërkojnë asociacionin njëetnik, ata po kërkojnë ndryshim të kushtetutes”, tha Kurti.
Tutje, kryeministri tha se është Kushtetuta e Serbisë, ajo e cila duhet të pësojë ndryshime, pasi e sheh ende Kosovën si pjesë të saj.
“E unë mendoj që për normalizim të marrëdhënieve duhet të ndryshohet Kushtetuta e Serbisë. Fjalia e 2-të e asaj kushtetute thotë se Kosova është pjesë integrale e Serbisë, prandaj duhet të hiqet ajo fjali. Pra për normalizim kjo kushtetutë duhet të pësojë ndryshim”, tha ai.
