Vërshimet e fundit në disa komuna të Kosovës kanë shkaktuar dëme të mëdha në infrastrukturë, shtëpi, biznese, kultura bujqësore, shkruan InLajmi.
Një komunë që e pësoi nga vërshimet është edhe Klina, ku dëmet ishin të mëdha në qytet dhe shumë fshatra.
Kryetari i kësaj komune, Zenun Elezaj në një deklaratë për InLajmin, thotë se dëmet nga vërshimet sipas përllogaritjeve preleminare kapin shifrën e mbi 9.4 milionë eurove.
“Në Agjencinë e Menaxhimit të Urgjencave e kemi dërguar një shumë me përllogaritje preliminare dhe dëmet nga vërshimet i kemi vlerësuar me shifrën 9.4 milionë euro, mirëpo kjo shumë nuk është definitive, pasi komisioni është ende në terren për vlerësimin e dëmeve”, tha Elezaj.
Elezaj theksoi se komuna nuk ka buxhet për t’i mbuluar këto dëme, prandaj siç theksoi ai, Klina pret ndihmën e Qeverisë së Kosovës.
“Komuna nuk ka buxhet për mbulimin e këtyre dëmeve, andaj e vetmja mundësi mbetet dërgimi i raportit për mbulimin e dëmeve në Qeverinë e Kosovës për kompensim, siç ndodhi edhe në vërshimet e kaluara”, tha ai.
I pyetur se cilat zona kanë pasur më shumë dëme, Elezaj deklaroi se përveç dëmeve në disa lagje të qytetit dhe shumë fshatra kanë pësuar dëme të konsiderueshme nga përmbytjet.
“Dëme të mëdha ka pësuar kryesisht qyteti i Klinës, më konkretisht lagjia Dukagjini, fshatrat si Dresniku, Ujmiri, Shtarica, Dushi, Jashanica, Pograxha, Krusheva e Madhe, Zllakuqani, Zajmi e disa fshatra të tjerë”, tha Elezaj.
Ndryshe, përveç Klinës, është Skenderaji, Istogu, Mitrovica, Podujeva, Peja, të cilët kanë pësuar më së shumti dëme materiale, e ku ndihma e Qeverisë së Kosovës është e patjetërsueshme. Shqipe Vishaj /InLajmi/
