U bë tashmë një javë kur qytetarëve të disa komunave të Kosovës para syve në pak minuta iu shkatërrua mundi e djersa e ndërtuar gjatë pothuajse gjithë jetës së tyre, e kjo pasi reshjet e dendura të shiut shkaktuan vërshime të mëdha në vend. E komunat që “ia panë sherrin” më së shumti ishin ajo e Skënderajt, Mitrovicës, Klinës, Istogut, Pejë, Gjakovës, Podujevës, shkruan InLajmi.
Në të gjitha komunat ku vërshimet bënë dëme të mëdha intitucionet lokale kanë filluar me vlerësimin e dëmeve në terren ndërkohë sipas raportimeve preliminare dëmet llogariten të jenë milionëshe.
Komuna e Skënderajt duket të jetë më e dëmtuara nga vërshimet ndërsa sipas përllogaritjeve preliminare vlera financiare e këtyre dëmëve shkon në 15 milionë euro.
I pari i Komunës së Skënderajt, Fadil Nura në një deklaratë për Gazetën InLajmi tha se pamundësia e mbulimit të këtyre dëmëve ka shtyer që të themelojnë Fondin Emergjent për Vërshime.
“Mbi 15 milionë sipas vlerësimeve preliminare është dëmi i shkaktuar nga vërshimet në Komunën e Skënderajt, e për fat të keq ne nuk kemi fond pothuajse fare dhe nuk kemi asnjë mundësi reale për mbulimin e dëmeve, e për këtë arsyeje kemi hapur Fondin Emergjent për Vërshime”, tha kryetari i Skënderajt, Fadil Nura për Gazetën InLajmi.
Sa i përket ndihmës nga Qeveria e Kosovës në lidhje me dëmet e shkaktuara ai tha se deri me tani nuk janë ndihmuar, por vlerat e dëmeve tha se i kanë drejtuar tek ekzekutivi.
“I kemi dërgu vlerat e dëmëve sipas vlerësimit të komisioneve përkatëse e tash të shohim prej qeverisë, ne kemi tregu sa janë ekonomi familjare, sa biznese, sa ekonomi bujqësore dhe të gjitha dëmët”, u shpreh Nura.
Sipas tij Qeveria e Kosovës posedon fondin rezervë për raste emergjente e që në këtë fond janë 46 milionë euro buxhet, ndërsa theksoi se rëndësi ka që kompensime nga qeveria do të ketë.
Kryetari Nura, tha se në mungesë të shifrave përfundimtare për vlerën e dëmeve nuk mund të përcaktojmë ende vlerën e mjeteve që do të kërkojmë nga qeveria.
“Me sa e kam parë qeveria ka 46 milionë euro buxhet për mbulimin e dëmeve, pra fonde reserve për raste emergjente, me rëndësi është që ka kompensime nga ana e qeverisë e tani mbetet të shihet se sa do të ndihmohemi, pasi nuk i kemi rezultatet përfundimtare të dëmeve atëherë nuk mund të japim shifra e deri në rezultate përfundimtare po presim e pastaj do kërkojmë edhe ndihmë nga qeveria”, tha kryetari Nura.
I pari i Skënderajt foli për Fondin Emergjent duke theksuar se aty janë derdhur mjete nga njerëz të vullnetit të mirë nga bizneset, por sipas tij në fond kontributi më i madh është nga mërgata jonë.
Nura bëri të ditur se në fond janë grumbulluar mjete, por nuk e saktësoi se për çfarë shume bëhet fjalë.
“Sa i përket Fondit Emergjent po shpresojmë se të enjten ose të premtën do e bëjmë të ditur së sa të holla janë mbledhur. Kemi më shumë të ardhura nga diaspora, organizata të ndryshme, biznese të ndryshme. Ndërsa nga organizata të huaja deri tani me sa di nuk kemi. Gjithashtu ende nuk kemi të dhëna se sa mjete janë derdhur në fond nga njerëzit e vullnetit të mirë, por me kohë do të bëhet publike edhe vlera e tyre”, përfundoi i pari i Komunës së Skënderajt.
Kujtojmë se përveç komunës së Skenderajt më e prekur nga vërshimet është edhe Komuna e Mitrovicës, ndërsa dëmet janë të mëdha e që nevojitet mbështetja e fuqishme edhe nga pushteti qendror. /Arjanita Osmanaj/ /InLajmi/
