Shtrenjtimi i tatimit në pronë, ka bërë që të ketë reagime të shumta në Kosovë.
Nga Ministria e Financave kanë thënë se komunat kanë qenë në dijeni dhe se shkallën e tatimit e kanë përcaktuar vetë komunat.
Por me një deklarim të tillë, nuk po pajtohen nga Komuna e Vushtrrisë.
Kryetari, Ferit Idrizi tha se për këtë vendim nuk ka qenë në dijeni.
“Sa i përket anës së komunikimit e koordinimit, unë vetëm kur e kam parë këtë vendim që ka ardh. Çdo vendim që vjen prej qeverisë, prej ministrisë që është i ligjshëm ne e zbatojmë, problemi nuk është a e zbatojmë a nuk e zbatojmë, por është se sa e përballojnë qytetarët. Unë personalisht këtë vendim deri sa ka ardh nuk e kam parë”, deklaroi Idrizi
Idrizi tha se vendimi për shtrenjtimin e tatimit në pronë nuk është mirëpritur nga Vushtrria.
Ai thotë se me këtë vendim, do të thellojë krizën ekonomike të qytetarëve.
“Ministria në kuadër të përgjegjësive të veta, sigurisht e ka vlerësuar të ketë rritje të tatimit në pronë e cila për neve si komunë nuk është e mirëpritur, për shkak të krizës ekonomike, sociale, të varfërisë, mandej e patëm edhe situatën e fundit këtë të vërshimeve në shumë komuna, edhe pse në komunën tonë shumë pak i ka prek, mirëpo megjithatë është një çmim që ka me qenë sfidues për ekonomitë familjare, për bizneset e kështu me radhë”, u shpreh ai.
Megjithatë, Idrizi thotë se vendimin do ta zbatojnë.
“Ne jemi të obliguar me i zbatu vendimet e ministrisë, është obligim ligjor, por ky vendim i MF-së për neve e vlerësojë se ka qenë i ngutshëm, i hershëm, derisa qytetarët janë në krizë kaq të rëndë ekonomike”, tha Idrizi për FrontOnline.
Këto ditë dhjetëra qytetarë janë ankuar pasi faturat e tatimit në pronë kanë mbërritur deri në dyfish në krahasim me vlerësimin e vitit të shkuar.
