Kryetari i Komunës së Rahovecit Smajl Latifi, u është drejtuar qytetarëve të kësaj komune për t’u dhënë sqarime rreth ngritjes së vlerës së tatimit në pronë, përcjell InLajmi.
Ai i njofton qytetarët se përgjegjës për rritjen e çmimit të tatimit në pronë është Ministria e Financave dhe jo Komuna e Rahovecit.
Latifi thekon se komuna nuk ka pasur dhe nuk do të ketë asnjë ndikim në rritjen e faturave të tatimit në pronë.
Tutje, kryetari tha se komuna e cakton vetëm përqindjen e tatimit në pronë në bazë të vlerësimit të Ministrisë.
Postimi i plotë i tij:
Të dashur qytetarë,
- Pas reagimeve dhe shqetësimeve të shumta dhe të arsyeshme të qytetarëve, poashtu të debateve të shumta në medie dhe në opinionin publik rreth çështjes së ngritjes së çmimeve të tatimit në pronë, e kemi parë të udhës të reagojmë për ta larguar hutinë e shkaktuar dhe për të sqaruar të gjithë qytetarët e Komunës së Rahovecit, që preken direkt nga ky proces.
- Bazuar në dispozitat e Ligjit në fuqi për Tatimin në Pronën e Paluajtshme (neni 17 i Ligjit nr. 06/005 dhe UA MF-Nr. 08/2019), Ministria e Financave, Punës dhe Transfereve përmes mekanizmit të saj është autoriteti i vetëm kompetent për vlerësimin e pronave, ndërsa komuna jonë sipas të njëjtit Ligj, cakton përqindjen e tatimit në pronë në bazë të vlerësimit të Ministrisë.
- Komuna e Rahovecit e ka caktuar përqindjen më të ulët të mundshme të tatimit në pronë.
- Norma më e ulët e lejuar është 0.16% dhe 0.17% për dy kategori të pronës, e shumës së përcaktuar nga Ministria e Financave, Punës dhe Transfereve.
Prandaj, për hir të së vërtetës, dua të informoj qytetarët e Rahovecit, se komuna nuk ka pasur dhe nuk do të ketë asnjë ndikim në rritjen e faturave të tatimit në pronë, por rritja ka ardhur si pasojë e rivlerësimit të pronave të cilin e ka bërë Ministria e Financave, Punës dhe Transfereve, si i vetmi autoritet kompetent.
Bashkëngjitur gjeni si dëshmi: vendimin e Kuvendit Komunal të Rahovecit si dhe Raportin e vlerësimit të përgjithshëm për prona rezidenciale për Komunën e Rahovecit, dokument i përgatitur nga Ministria e Financave, Punës dhe Transfereve. /InLajmi/
