Rritja e tatimit në pronë ka sjellë reagime të shumta nga qytetarët. Ata po shprehen se një rritje e tillë është e papërballueshme në kohë krize.
Eksperti i ekonomisë, Lulzim Beqiri, duke folur në lidhje me këtë çështje ka theksuar se rritja e tatimit në pronë ka tejklauar edhe 100%-shin e vlerës së faturuar në vitin 2022.
Beqiri tha për se kjo rritje e befasishme është goditje pas shpine për tatimpaguesit duke patur parasysh edhe inflacionin e lartë.
“Ngritja e tatimit në pronë pa paralajmërim ka tronditur qytetaret e Kosovës, një rritje e cila ka për të vështirësuar edhe më tej gjendjen ekonomike në vend, për më tepër kjo rritje ka tejkaluar edhe 100%-shin e vlerës së faturuar në vitin 2022, kjo rritje e cila është bërë në mënyrë të befasishme pa paralajmërim pa diskutim fare me tatimpaguesit është goditje pas shpine duke marrë për bazë edhe inflacionin e lartë që në disa produkte arrin deri në 50%”Beqiri tutje ka potencuar se skandali tjetër në lidhje me rritjen e tatimit në pronë është edhe hedhja e fajit herë tek komunat e herë tek Ministria e Financave.
Ai tha se ky vendim duhet të anulohet. “Skandali tjetër i rritjes së tatimit është edhe hedhja e fajit herë te komunat e herë të ministria e financave e që sipas ligjit del të jetë ministria përgjegjëse e vlerësimit të pronave, prandaj kanë gjete kohë të tallen me qytetarët e vet, kam frikë se një pjesë e madhe e qytetarëve kanë për të bojkotuar këtë rritje dhe në mënyrë automatike do të ketë edhe të hyra vetanaka komunale më pak edhe ashtu kemi pas mungesë të inkasimit viteve tjera lere më me rritje e shto kësaj edhe rritjen në mënyrë të fshehtë”
“Ministria e Financave duke u bazuar edhe në situatën ekonomike në vend rritjen e inflacionit kohën dimërore duhet të anuloj ngritjen e bazës së tatimit, më pas të del në diskutim publik dhe qytetarët të informohen drejt dhe saktë lidhur me metodat e përdoruara me rastin e vlerësimit të pronave.Mua personalisht prona më është vlerësuar me mbi 1300 euro metra katrorë e që në fakt është mbivlerësuar dyfish me vlerën e tregut, prandaj duhet stopim i faturimit të tatimit në pronë, kthim në vlerën e vjetër e diskutim publik lidhur me rritjet eventuale” deklaroi Beqiri .
Në lidhje me këtë çështje ka folur edhe Kryetari i Asociacionit të Komunave të Kosovës,(AAK) Sazan Ibrahimi.
Ibrahimi tha se AKK-ja s’ka të bëjë fare me një vendim të tillë.
Ai ka kërkuar nga niveli qëndor që të tregojnë pse ky vendim është marrë nga Ministria e Financave.
“Është shumë e vërtet që niveli qendror ka dashur që fajin për rritjen e faturave për tatim në pronë t’i a vë komunave. Mirëpo ligjërisht komunat nuk kanë kompetenca për ngritjen e faturave për tatim në pronë ndaj qytetarëve. Kompetenca e komunave është që përcaktohet norma tatimore dhe ajo shkon prej 0.15 % deri në 1 % të vlerës së pronës”, ka thënë Ibrahimi.
“Komunat nuk e kanë ndryshuar normën tatimore fare, nuk e kanë prekur, por ka ndryshuar rivlerësimi i Ministrisë së Financave ndaj pronave. Dhe këtu është problemi ku besojmë që niveli qendror është dashtë të jetë korrekt ndaj qytetarit dhe të tregoj që ministria e Financave e ka bërë një rivlerësim të ri dhe në bazë të atij rivlerësimi faturat janë rritur për tatimin në pronë” tha Ibrahimi .
Sazan Ibrahimi, Kryetar i Asociacionit të Komunave të Kosovës, në lidhje me këtë çështje kanë reaguar edhe disa nga komunat e Kosovës, shkruan Gazeta Blic.
Ata kanë sqaruar se rritja e tatimit në pronë nuk është bërë nga komuna por nga Ministria e Financave.
