Reshjet e herëpashershme të shiut në Kosovë do të vazhdojnë gjatë gati tërë natës së sontme dhe orëve të hershme të mëngjesit. Në disa vise pritet të përzihen me shqotë dhe borë, ndërsa reshje të dendura bore do të bien në viset malore.
Nesër në Kosovë pritet të mbajë mot i vranët. Në mëngjes dhe paradite me reshje lokale shiu, ndërsa në viset kodrinore-malore reshje bore. Gjatë ditës reshjet do të ndërpriten, por mund të vazhdojnë ende në disa lokacione si rrebeshe të izoluara shiu dhe fjolla bore në viset kodrinore-malore.
Temperaturat do të shënojnë ulje dhe me këtë fillojnë rrymimet ajrore nga veriu.Në Shqipërinë kontinentale nesër priten reshje shiu paradite e bore në zonat malore, ndërsa në Ultësiren perëndimore dhe jug reshjet do të pushojnë dhe do të ketë intervale të gjata kohore me diell.
Reshje të dendura shiu nesër paradite priten edhe në Maqedoninë Veriore dhe Kosovën lindore, ndërsa në veri të Malit të Zi priten reshje bore. Pasdite ose në mbrëmje reshjet pritet të ndërpriten.
Të mërkurën na pret mot kryesisht i vranët e më i ftohtë. Priten reshje të pakta sporadike kryesisht bore.
Të enjtën një sistem i ri i vranësirave vjen nga jugu i Shqipërisë dhe Maqedonia Veriore. Në Maqedoninë Veriore priten reshje bore të cilat pastaj priten lokalisht edhe në Kosovë, shkruan Meteo Ballkan.
Reshje bore priten që nga juglindja e Shqipërisë, Maqedonia Veriore dhe lokalisht edhe në Kosovë dhe normalisht bora pritet edhe në zona të ulëta mbidetare.
