Vërshimet u kanë shkaktuar dëme të mëdha edhe banorëve të Klinës, një pjesë e madhe e të cilëve kanë mbetur pa kulm në kokë. Banorët kanë thënë se nëse shteti nuk u ndihmon, nuk do të kenë më as ku të strehohen. Ndërsa, kryetari i Klinës, Zenun Elezaj ka deklaruar se komuna nuk ka ndonjë fond të veçantë për mbulimin e këtyre dëmeve, por shpreson në ndihmën e qeverisë.
Balta ka mbuluar gjithë dyshemenë e shtëpisë së Naim Imerit nga Komuna e Klinës.
Për shkak të vërshimeve të disa ditëve më parë, e njëjta tashmë është bërë e pabanueshme.
Familja 5 anëtarëshe është detyruar që të gjejë strehim diku tjetër, derisa e shtëpia e tyre të jetë e gatshme për banim.
Naim Imeri ka rrëfyer se të gjitha mobiljet e paisjet shtëpiake i janë dëmtuar, andaj edhe ka kërkuar ndihmën e shtetit, pasi është shprehur se nuk do të ketë se ku të qëndrojë ditëve në vijim, e as si të renovojë shtëpinë.
Si pasojë e vërshimeve, dëme të mëdha u shkaktuan edhe në këtë fabrikë të mobilieve.
Pronari i saj tregoi se ende nuk e di nëse paisjet e dëmtuara do t’i rregullohen, e nëse një gjë e tillë s’ndodh, ai thotë se si biznes do të falimentojnë.
Ndërsa, kryetari i Klinës, Zenun Elezaj ka theksuar se komuna nuk ka ndonjë fond të veçantë për mbulimin e këtyre dëmeve, por shpreson në ndihmën e qeverisë.
Ai ka thënë se komuna do të del shumë shpejtë me një raport përfundimtar me vlerën e dëmeve, shkruan Kanal10.
Klina, Skenderaj, Mitrovica, Podujeva dhe Istogu janë disa nga komunat më të prekura nga vërshimet e ditëve të fundit.
