Kreu i Aleancës për Ardhmërinë e Kosovës, Ramush Haradinaj ka kujtuar 23 janarin e vitit 1899 në të cilin u formua Lidhja e Pejës, përcjell InLajmi.
Haradinaj tha se ky përvjetor shënon një prej etapave më të rëndësishme në historinë e popullit të Kosovës.
Ndër të tjera ai kujtoi vdekjen e heroit kombëtar Isa Boletini që sipas tij ishte figura që identifikoi fatin e tij personal dhe atë të atdheut.
Tutje, Haradinaj vlerëson se mbrojtësi i pavarësisë e komandant çetash, Isa Boletini nuk është vetëm prijës popullor, por edhe frymëzues për të dashur e vlerësuar lirinë dhe Atdheun.
Postimi i plotë i tij:
23 janari na kujton Lidhjen e Pejës, e cila është njëra prej etapave më të rëndësishme të historisë së Kosovës.
Lidhja e Pejës e formuar më 1899 në krye me Haxhi Zekën, pas shumë vendimeve të rëndësishme që të forconte unitetin kombëtar në përpjekjet për të kundërshtuar copëtimin e tokave shqiptare, shpalli edhe Besën për një vit. Ky akt i Besëlidhjes na mëson se shqiptarët janë patriotë, të aftë që të dalin përtej interesave dhe inateve personale kur është në pyetje interesi i Atdheut.
Po ashtu, 23 janari na kujton heroin kombëtar Isa Boletini, cili identifikoi fatin e tij personal me fatin e Atdheut, besnikërinë dhe dashurinë ndaj të cilit e shprehu me fjalët “Unë jam mirë kur asht mirë Shqypnia”.
Mbrojtësi i pavarësisë e komandant çetash, Isa Boletini nuk është vetëm prijës popullor, por edhe frymëzues për të dashur e vlerësuar lirinë dhe Atdheun.
Sot, në 107 vjetorin e rënies së tij, jeta e vepra e tij janë më madhështore se asnjëherë./InLajmi/
