Vërshimet në disa komuna të Kosovës kanë shkaktuar dëme të mëdha materiale në ekonomi familjare dhe biznese, shkruan InLajmi.
Njëra nga këto komuna që pësoi nga vërshimet është edhe Klina, gjendja e së cilës sidomos në disa fshatra është e rëndë, ku shumë shtëpi, prona publike e private pësuan dëme të mëdha.
Se sa është vlera e këtyre dëmeve të shkaktuara, kryetari i Klinës Zenun Elezaj, në një deklaratë për InLajmin njoftoi se brenda 8 ditëve do të bëhet e ditur një shifër më e saktë nga Komisioni për vlerësimin e dëmeve, i cili veçse ka filluar me evidentimin e dëmeve, duke mos dhënë një shumë konkrete.
“Shumën totale për dëmet e shkaktuara nga vërshimet nuk e kemi ende, komisionet janë duke punuar në terren dhe janë duke bërë incizime detale të ekonomisë familjare dhe të gjitha sferat e dëmtimeve. Tani për tani jemi duke i evidentuar vetëm pajisjet, pastaj do të hulumtohet edhe për vlerën e çmimeve të tyre. Brenda 8 ditëve do të kryhet procesi i vlerësimit detal”, tha Elezaj.
Kryetari Elezaj theksoi se sfidë për Komunën e Klinës pas vërshimeve mbetet përmbushja e kërkesave të qytetarëve, pasi edhe buxheti i kësaj komune është i kufizuar dhe dëmet janë të mëdha.
Tutje, ai tha se komuna do t’i vlerësojë dëmet e shkaktuara nga vërshimet, por që është e patjetërsueshme ndihma e qeverisë, pasi në rastet e fatkeqësisë natyrore Komuna e Klinës nuk ka buxhet të ndarë.
“Reshjet e shiut në ditët e fundit kanë lënë shumë dëme pas vete. Ne menjëherë kemi filluar punën për riparimin e tyre, megjithëse është mjaft sfiduese t`i përmbushim kërkesat e shumta të qytetarëve edhe përkundër bashkëpunimit të shkëlqyer me institucionet relevante. Komuna e ka linjen buxhetore vetëm për çështje të caktuara që janë të destinuara për projekte të ndryshme, mirëpo për këtë aspekt nuk ka buxhet të ndarë. Me udhëzime administrative është e përcaktuar se komuna i vlerëson dëmet e shkaktuara, e aprovon Kuvendi Komunal dhe i dërgohet qeverisë për financim dhe kompensim të dëmeve”, tha Elezaj për InLajmin.
Ndryshe, secila komunë që është përmbytur ka ofruar ndihmë për qytetarët e saj aq sa kanë pasur mundësi për evakuuimin dhe akomodimin e tyre, por kompensimet materiale mbesin sfidë për udhëheqësit e komunave ndërsa që të gjithë presin “dorën” e Qeverisë së Kosovës për sanimin e dëmeve nga kjo fatkeqësi natyrore. /InLajmi/
