Reshjet e shiut kanë shkatërruar pothuajse gjithçka në Komunën e Skënderajt, Mitrovicës, Klinës, Podujevës, Pejës, Istogut duke bërë që qytetarët të braktisin edhe shtëpitë e tyre jo nga dëshira, por nga dëmet e mëdha që pësuan, shkruan InLajmi.
Në lidhje më këtë Gazeta InLajmi ka kontaktuar më drejtorin e Emergjencave në Komunën e Mitrovicës, Bahtir Maxhuni i cili tha së dëmet në këtë komunë janë milionëshe dhe se situata atje është akoma emergjente.
Maxhuni nuk arriti të jap vlera të sakta, por ai tha se jemi duke mbledhur të dhëna për dëmet në të njëjtën kohë edhe po ofrojmë strehim familjeve që kanë mbetur pa kulm mbi kokë.
“Ende e kemi situatën emergjente, por janë miliona euro në përgjithësi dëme i shkaktuar nga vërshimet në Komunën e Mitrovicës, por vlerë të caktuar nuk kemi pasi akoma jemi në gjendje emergjente dhe po i mbledhim të dhënat njëkohësisht po merremi edhe me strehimin e familjeve që ua janë dëmtuar shtëpitë. Sipas asaj që shihet në terren dëmet janë të mëdha dhe sanimi i tyre kërkon vlera milionëshe” ,tha Bahtir Maxhuni, drejtor i Emergjencave në Komunën e Mitrovicës.
Ndërkohe Maxhuni më keqardhje thotë se Komuna e Mitrovicës nuk ka fond financiar emergjent për mbulimin e dëmeve të shkaktuara nga vërshimet.
Mëqenëse komuna ka mungesë të financave për mbulimin e dëmeve nga vërshimet, Maxhuni tha se do të shohim burime tjera alternative për të dal në ndihme popullatës dhe bizneseve.
“Jo komuna jonë, por asnjë komunë nuk ka fond emergjent e të them të drejtë po shohim ndonjë burim për ndihmë sepse nuk kemi buxhet financiar për mbulimin e dëmeve të shkaktuara”, u shpreh Maxhuni.
Ai ka folur edhe për nevojën e mbështetjes qeveritare për sanimin e dëmeve nga vërshimet, ndërsa ka theksuar se deri më tani nuk ka ndonjë shenjë se qeveria do ta ndihmoi në këtë drejtim.
“Nga Qeveria e Kosovës nuk mund të them se sa presim ndihmë pasi që kryetari i komunës, Bedri Hamza është në kontakt me nivelin qendror dhe mbetet të shihet se sa do ndihmohemi, deri me tani nuk kemi ndonjë ndihmë nga qeveria”, përfundoi Maxhuni./Arjanita Osmanaj/ /InLajmi/
