Podujeva, Skenderaji, Klina, Peja, Istogu, Gjakova kanë pësuar dëme të mëdha nga vërshimet e ditëve të fundit, shkruan InLajmi.
Dëmet materiale që kanë pësuar këto komuna kapin shifra marramendëse, pasi shtëpi, biznese private dhe publike janë katandisur keq nga përmbytjet.
Ndër komunat që ka pësuar dëme të shumta materiale është edhe Podujeva. Kryetari i kësaj komune Shpejtim Bulliqi, në një deklaratë për Gazetën InLajmin, ka thënë se vlera e dëmeve të shkaktuara nga vërshimet nuk dihet ende, pasi komisioni është ende në terren dhe po bën evidentimin e dëmeve.
“Për vlerën e përgjithshme të dëmeve të shkaktuara nga vërshimet ende nuk mund të japim shifra, Komisioni për Vlerësimin e Dëmeve të shkaktuara nga fatkeqësitë natyrore ka filluar punën në teren për evidentimin e të gjitha dëmeve të shkaktuara. Tash për tash mund të them vetëm se ka dëme të konsiderueshmë në infrastrukturë rrugore, toka bujqësore e poashtu dëme ka edhe në shtëpi banimi, biznese private e ferma të bagëtive”, tha Bulliqi.
Kryetari Bulliqi thotë se komuna e ka të pamundur të mbulojë koston e dëmeve të shkaktuara, prandaj theksoi se do të kërkohet ndihmë nga Qeveria e Kosovës për të kompensuar dhe ndihmuar llapjanët.
“Komuna e ka të pamundur të mbulojë gjithë koston e dëmeve të shkaktuara, ne do të ndajmë një kosto për të kompenzuar qytetarët e prekur nga vërshimet dhe do të kërkojmë nga ana e Qeverisë së Kosovës të kompensojë një pjesë të dëmeve të shkaktuara nga vërshimet e fundit për qytetarët llapjanë”, tha ai për InLajmin.
Ndryshe, edhe komunat e tjera që kanë pësuar dëme të mëdha kanë kërkuar ndihmë nga Qeveria e Kosovës, pasi siç thonë kryetarët e këtyre komunave, buxheti i komunave është i kufizuar. /InLajmi/
