Në Kosovë na pret mot i vranët, ndërsa reshje shiu do të rifillojnë gjatë natës. Me uljen e temperaturave në viset kodrinore-malore reshjet e shiut do të shndërrohen në reshje shqote e bore, ndërsa nëpër ultësira mund të paraqiten reshje të përziera dhe atë vetëm lokalisht për shkak të prezencës së ajrit të ngrohtë dhe depërtimit të pamjaftueshëm të ajrit të ftohtë.
Gjatë ditës së nesërme reshjet do të pushojnë (madje priten edhe intervale kohore me diell në disa rajone) për të rifilluar përsëri gjatë orëve të natës së ardhshme.
Në Shqipëri nesër pritet të mbajë mot i vranët dhe me reshje shiu, ndërsa reshje bore priten vetëm në zonat kodrinore-malore në veri, verilindje, lindje dhe juglindje të vendit. Në mbrëmje reshjet pritet të pushojnë për të rifilluar përsëri më vonë.
Edhe në Maqedoninë Veriore, Mal të Zi dhe Kosovën lindore nesër pritet të mbajë mot i vranët dhe me reshje shiu e bore në viset kodrinore-malore. Vetëm në veri të Malit të Zi priten reshje të dendura bore të cilat pastaj do të pushojnë.
Gjatë natës së ardhshme do të rifillojnë reshjet e shiut dhe borës për shkak të ardhjes së ciklonit më të ri nga Italia. Gjatë orëve të natës dhe mëngjesit të hershëm priten reshje bore në shumë zona, por gjatë orëve të ditës së shtunë ato kthehen në reshje shiu për hskak të rritjes së menjëhershme të temperaturave dhe erërave jugore, shkruan Meteo Ballkan.
Të dielën fatmirësisht parashihet që reshjet të pushojnë, por ato pritet të rikthehen të hënën ku priten reshje lokale shiu e në zonat malore reshje bore.
