U kritikua nga deputetët e opozitës për dënimin e marrë për mosdeklarimin e pasurisë, por në mbrojtje të ministres Hajdari del partia në pushtet, ndërsa opozitës i bëjnë thirrje të mos dalin jashtë pikave të rendit të ditës, raporton InLajmi.
I del në krah ministres që opozita kërkoi shkarkimin, shefja e Grupit Kuvendar të Vetëvendosjes Mimoza Kusari-Lila e cila fillimisht iu drejtuar deputetit të PDK-së Abelard Tahiri të cilit i kërkoi ti përmbahet agjendës së seancës e të mos dal jashtë rendit të ditës.
“Po, është mungesë e efikasitetit tonë të përbashkët në këtë legjislaturë. Por do të duhej të kishte përmbajtje brenda agjendës. Ministrja e prezantoi një projektligj të rëndësishëm në diskutim. Prita një elaborim të mirëfilltë nga grupi më i madh opozitar me mendimin se jeni kthyer në seriozitet në vitin 2023. Për këtë çështje ju keni kërkuar debat i cili ende nuk është bërë. Atë debat besoj se të gjithë bashkë mund të dakordohemi ta kemi në mbledhje të kryesisë. Të mos e ndryshojmë agjendën për të cilën jemi ftuar. Ju sugjeroj që të mbesim në kuadër të agjendës”, u shpreh Kusari-Lila.
Ndërsa, deputeti tjetër i Vetëvendosjes, Adnan Rrustemi, si mbrojtje ndaj kritikave të qeverisë me theks ndaj ministres Hajdari, “sulmoi” opozitën ndërsa u sugjeroi atyre që çështjet teknike të mos i kthejnë në çështje politike.
“Ne kemi hartuar Ligjin e ri për deklarimin e pasurisë i cili hyn ne fuqi 6 muaj pas miratimit. Me ligjin e ri, vonesat nuk janë as vepër penale. Ministrja Hajdari e ka deklaruar pasurinë por me 2 ditë vonesë, meqë e ka pranuar fajin. Por, po të paraqiste ankesë në shkallë të 2-të do të dilte e pafajshme. Mos tentoni një çështje teknike ta ktheni në çështje politike”, ka thënë Rrustemi./InLajmi/
