Jeton Zulfaj, këshilltari i kryeministrit Albin Kurti, ka thënë se çështja e themelimit të Asociacionit të komunave me shumicë serbe është rrëzuar.
“Nuk do të ketë një draftim të tillë… Pasi u rrëzua nga Gjykata Kushtetuese nuk është se ishin shumë të interesuar që të kishte një draft sa më shpejt të Asociacionit. Pra jemi dëshmitarë të gjithë pastaj kaluam në tema tjera, dolën shkëmbime territoriale, pra ne mendojmë se kjo temë është rrëzuar, Gjykata e ka rrëzuar për shkak se nuk është në shkronjën dhe në frymën e Kushetutës”, tha ai.
Tutje ai tha se urgjenca me të cilën janë ftuar për bisedime në nëntor të vitit të kaluar, sipas tij, ishte që të bisedohet për një marrëveshje në fund të marsit të këtij viti.
“Urgjenca me të cilën jemi ftuar në nëntorin e vitit të kaluar ishte që të bisedojmë deri në fillim të këtij marsi të kishim një marrëveshje, pra ajo ishte urgjencë dhe ne tham hajde të takohemi sa më shpejtë në mënyrë që ta trajtojmë me këtë urgjencë çfare e ka Bashkimi Evropian dhe aty të flasim pastaj edhe për kërkesat të cilat mund t’i ketë Serbia”, tha tutje ai për TëVë1.
Kurse edhe kryeministri Kurti në një intervistë për gazetën italiane “La Stampa”, ka thënë se Marrëveshja për Asociacionin e komunave me shumicë serbe bie ndesh me Kushtetutën dhe për këtë arsye ajo nuk është duke u zbatuar.
