Ministrja e Drejtësisë, Albulena Haxhiu ka bërë të ditur së është lëshuar urdhërarrest ndërkombëtar siç thotë ajo kriminelët e Masakrës së Reçakut, përcjell InLajmi.
Ajo është shprehur e entuziazmuar për këtë lajm pasi sipas saj kjo e gëzon gjithë popullin, por mbi të gjitha është lajmi mirë për drejtësinë e shtetit të Kosovës meqë është hera e parë që po shihen përpjekje serioze në këtë drejtim.
Haxhiu nuk ka lënë anash kritikat ndaj qeverisjeve të kaluara në raport me kërkim drejtësie për krimet e kryera serbe gjatë luftës në Kosovë.
Sipas saj ish-kryeprokurori Aleksander Lumezi nuk kishte vullnet e as interes të punoi në këtë drejtim.
Por ministrja nuk harroi të adresoi kritika edhe ndaj misioneve të instaluara në Kosovë si UNMIK e EULEX të cilat sipas Haxhiut nuk kanë bërë sa duhet në zbardhjen e rasteve të krimeve të luftës.
Postimi i plotë i saj:
Kërkesa për lëshimin e urdhërarrestit ndërkombëtar për kriminelët e Masakrës së Reçakut është lajm i mirë për drejtësinë dhe shtetin tonë sepse për herë të parë po shihen përpjekjet serioze për trajtimin e krimeve të luftës. Ky është një lajm që qytetarët dhe familjarët e të vrarëve e prisnin prej vitesh.
Qeverisjet e kaluara sikurse edhe sistemi prokurorial në krye me ish kryeprokurorin Lumezi nuk kanë pasur as vullnetin e as interesin për trajtimin serioz të këtyre krimeve ndaj popullit tonë.
A duhet të japin përgjegjësi për gjithë këtë mosveprim?
A duhet të japin përgjegjësi KPK që ende edhe përkundër faktit që kemi shtuar buxhetin që më shumë se 16 muaj, nuk është plotësuar me prokurorë e bashkëpunëtorë, Departamenti për krime lufte në kuadër të PSRK?
A ka përgjigje sistemi se pse nuk po zbatohen dispozitat për gjykimin në mungesë të kriminelëve të luftës edhe përkundër që kemi hequr pengesat?
Është tejet e rëndë që misionet e instaluara në Kosovë, UNMIK e EULEX sikurse edhe sistemi jonë i drejtësisë nuk kanë bërë sa duhet në drejtim të hetimit dhe gjykimit të shumë krimineleve të luftës me qëllim që të sjellim drejtësi për qindra masakra në Kosovë sikurse edhe për Masakrën e Reçakut të cilën e rikujtuam dje.
Shumë më tepër do të mund të bëhej menjëherë pas luftës, sidomos pas shpalljes së pavarësisë, e në veçanti nga 2018 e këtej.
Institucionet tona jo vetëm që janë themeluar nga gjaku i të rënëve dëshmorë edhe martirë, por e kanë obligim themeltar të sjellin drejtësi për secilin krim të kryer nga shteti i Serbisë./InLajmi/
