Ministrja e Drejtësisë në Kosovë, Albulena Haxhiu ka kujtuar Masakrën e Reçakut në 24 vjetorin e shënimit të kësaj date, përcjell InLajmi.
Haxhiu tha haptas se Reçaku është dëshmi për gjithë botën për gjenocidin e shtetit serb në të gjithë Kosovën, e që për këto krime të kryera duhet të zbardhen.
Ajo tha se 45 të rënët do të kujtohen gjithmonë, por edhe nuk do të ndalen duke kërkuar drejtësi për ta duke dënuar ata që kryen këtë akt mbi popullin kosovar.
Postimi i plotë i saj:
Reçaku është dëshmia e fuqishme në sytë e mbarë botës për gjenocidin e Serbisë ndaj popullit të Kosovës
45 civilë shqiptarë, të paarmatosur u masakruan nga policia dhe ushtria kriminale e Serbisë.
Sikur as kjo të mos mjaftonte, një varg masakrash do të kryheshin me direktivat e regjimit serb ndaj popullësisë së pafajshme e liridashëse, vetëm pse ishin shqiptarë.
Do t’i kujtojmë përherë e do të angazhohemi pandalur që Serbia të marrë dënimin e merituar për të gjitha ato krime që ka kryer, për të cilat nuk pendohet dhe të cilat i mohon.
Do të angazhohemi që brezave t’ua mësojmë mirë historinë me vuajtjet e pashembullta që populli ynë përjetoi nga kriminelët serb në periudha të ndryshme, e veçmas në atë të gjysëmshekullit të 20-të.
Do ta mbrojmë lirinë tonë të shtrenjtë duke kujtuar përherë martirët e rënë gjatë luftës për liri./InLajmi/
