Në kryeqytetin e Austrisë, me ceremoni shtetërore të gardës ceremoniale, Kryeministri i Republikës Kosovës, Albin Kurti u mirëprit nga Kancelari i Austrisë, Karl Nehammer për një takim bilateral, përcjell InLajmi.
Kryeministri Kurti shprehu mirënjohjen e tij për kontributin e Austrisë në paqen, sigurinë dhe zhvillimin e vendit tonë dhe rajonit, dhe për mbështetjen e vazhdueshme ndaj Republikës së Kosovës.
Ata diskutuan për marrëdhëniet bilaterale tashmë të shkëlqyera ndërmjet 2 vendeve dhe mundësitë e rritjes dhe fuqizimit të mëtejmë të tyre në të gjitha fushat, me theks te bashkëpunimi ekonomik dhe shkëmbimi tregtar. Me këtë rast, Kryeministri Kurti e ftoi Kancelarin Nehammer që t’i bashkëngjitet njërit nga shumë delegacioneve ekonomike austriake që do të vizitojnë Kosovën gjatë këtij viti.
Kryeministri Kurti e njoftoi Kancelarin Nehammer për punën e deritanishme të Qeverisë në kuadër të agjendës së saj reformuese dhe të agjendës integruese. Ai po ashtu e njoftoi Kancelarin për qasjen proaktive, konstruktive dhe kreative të Kosovës në procesin e dialogut me Serbinë, duke nënvizuar se dialogu duhet të prodhojë një marrëveshje për normalizimin e plotë të marrëdhënieve ndërmjet 2 vendeve me njohje reciproke në qendër.
U diskutua edhe për agresionin ushtarak të Rusisë mbi Ukrainën, dhe për rrezikun e ndikimit malinj të Rusisë në Ballkanin Perëndimor nëpërmjet aktorëve të ndryshëm. /InLajmi/
