Ish-Ambasadori i OSBE-së në Kosovë, William Walker, tha se po provon ta përfundoj para se të shkoj në botën tjetër, libër ky për të cilën qeveria kosovare ndau 70.000 euro për botimin e tij.
“Qenka interesante, s’paskam dëgjuar”, tha Walker kur u pyet nga Insajderi për ndarjen e këtyre fondeve, derisa tha se do të niset për në Kosovë për të marrë pjesë në datën përkujtimore të 15 janarit për Masakrën e Reçakut.
“Do të jetë një libër i vetëm, përshkrime të përjetimeve të mia të ngjarjeve në Reçak, të atij krimi. Do të jetë një përmbledhje e asaj”, na tha Walker.
Në lidhje me rëndësinë e botimit të këtij libri, William Walker kujton se Masakra e Reçakut ishte pikëkthesa historike e cila lëvizi tërë Aleancën e Atlantikut të Veriut për të ndërhyrë në Kosovë kundër regjimit gjenocidial të Sllobodan Millosheviçit.
“Rëndësia është se Kosova është një shtet i ri në qendër të Evropës dhe nuk mendoj se do ishte bërë ashtu siç u bë nëse masakra e Reçakut nuk do të kishte ndodhur dhe reagimi ndërkombëtar të mos kishte qenë ai që ishte, aq fuqishëm. Solli luftën e NATO’s, që mendoj që askush atë kohë po e mendonte, e cila erdhi më së shumti si rezultat i reagimit pas masakrës së Reçakut”, tha ai për Insajderin.
“Mendoj se Qeveria në Kosovë dhe njerëzit që kam takuar gjatë 23 viteve gjithmonë më kanë pyetur se a do të shkruani libër për këtë ngjarje të rëndësishme, dhe pikërisht këtë po e bëj”, tha Walker.
