Kryeministri i Kosovës, Albin Kurti numëroi të arriturat në sistemin e zbatimit të ligjit në vend gjatë vitit 2022, përcjell InLajmi.
Shefi i ekzekutivit tha se gjatë vitit të kaluar u realizuan 854 operacione policore kundër krimit të organizuar dhe kontrabandës, ku dhe u arrestuan 3202 veta, prej tyre 301 zyrtarë publikë.
Kurti shtoi se qeverisja e tij ndërtoi 4 objekte dhe stacione policore në veri të Kosovës. Tutje bëri të ditur krzeministri se në pjesën veriore është bërë shtrirja e rrjetit optik në gjithë vendin duke mundësuar shtrirjen e valëve telefonike, rrjetit të internetit dhe komunikimit me radiolidhje.
Postimi i plotë i tij:
Gjatë vitit që lamë pas, kemi vazhduar me zbatimin e ligjshmërisë në gjithë territorin e Republikës:
U realizuan 854 operacione policore kundër krimit të organizuar dhe kontrabandës;
U arrestuan 3202 veta, prej tyre 301 zyrtarë publikë;
Mbyllëm 16 rrugë ilegale në veri të vendit;
Shkatërruam 69 grupe kriminale;
U konfiskuan mbi 1.8 ton substanca narkotike;
Shkatërruam 5 laboratore të drogës në veri të Kosovës, me vlerë qindra milionëshe në substanca dhe në pajisje si dhe 3 laboratore për prodhimin e kriptovalutave, po ashtu në veri;
Mbi 14 milionë euro janë ngrirë nën dyshimin e keqpërdorimeve dhe shpërlarjes së parave;
Janë sekuestruar mbi 300 mijë litra karburante që s’ishin konform me aktet nënligjore;
Ndërtuam 4 objekte dhe stacione policore në veri të Kosovës si dhe bëmë shtrirjen e rrjetit optik në atë pjesë të vendit tonë, duke mundësuar shtrirjen e valëve telefonike, rrjetit të internetit dhe komunikimit me radiolidhje;
Krijuam Njësitin e Ndërhyrjes së Shpejtë të Kufirit, në kuadër të Policisë së Kosovës, i cili angazhohet në luftimin e kontrabandës, trafikimit me qenie njerëzore dhe keqpërdorimeve të tjera përgjatë vijës kufitare. /InLajmi/
